Bayern Munich ka rikthyer në vëmendje Dani Olmon si një nga opsionet për të përforcuar repartin ofensiv. Klubi bavarez po shqyrton mundësinë për të lëvizur që në merkaton e janarit, veçanërisht për shkak të interesimit në rritje të klubeve të tjera për Jamal Musialën dhe Michael Olisen.
Olmo është një futbollist që njihet mirë në futbollin gjerman. Para transferimit te Barcelona, spanjolli kaloi katër sezone te RB Leipzig, ku me paraqitjet e tij tërhoqi edhe më herët vëmendjen e Bayern Munichut.
Megjithatë, një transferim i mundshëm do të ishte i kushtueshëm. Sipas raportimeve, Barcelona e vlerëson Dani Olmon rreth 60 milionë paund, që korrespondojnë me afërsisht 70 milionë euro.
28-vjeçari iu bashkua Barcelonës në vitin 2024 për rreth 55 milionë euro, pas aventurës së tij te RB Leipzig. Me klubin gjerman, Olmo regjistroi 29 gola dhe 34 asistime.
Edhe në Barcelonë ai ka vazhduar të jetë produktiv, duke arritur në kuotën e 20 golave dhe 20 asistimeve në afro 100 paraqitje.
Vlera e Olmos është rritur edhe falë paraqitjeve me kombëtaren e Spanjës. Mesfushori ofensiv ishte një prej protagonistëve të triumfit të Spanjës në Kupën e Botës gjatë verës, duke qenë titullar në të gjitha ndeshjet, përveç dy prej tyre, përfshirë edhe finalen.
Me fanellën e kombëtares spanjolle, ai numëron aktualisht 58 paraqitje dhe 12 gola.