Ministri i Punëve të Brendshme, Ervin Demo, zhvilloi një takim me ambasadoren e Mbretërisë së Holandës në Shqipëri, Marleen Monster.
Sipas ministrit, në fokus të takimit ishte forcimi i bashkëpunimit mes dy vendeve në fushën e sigurisë, luftës kundër krimit të organizuar dhe menaxhimit të migracionit.
Demo bëri të ditur se gjatë takimit është diskutuar edhe avancimi i marrëveshjes së re dypalëshe për bashkëpunimin në fushën e sigurisë.
“Takimi vjen në kuadër të përpjekjeve për thellimin e bashkëpunimit dypalësh në çështjet e sigurisë dhe zbatimit të ligjit. Një hap i rëndësishëm në këtë drejtim është avancimi i marrëveshjes së re dypalëshe për bashkëpunimin në fushën e sigurisë”, tha ai.
Sipas ministrit marrëveshja synon të krijojë një bashkëpunim më të ngushtë dhe konkret mes strukturave ligjzbatuese të Shqipërisë dhe Holandës.
“Holanda mbetet një partner i rëndësishëm për Shqipërinë, në fushën e sigurisë, sundimit të ligjit dhe në rrugën tonë drejt Bashkimit Europian”, u shpreh Demo.