Gjykata e Tiranës ka caktuar masën e arrestit në burg për 31 persona të dyshuar si pjesë e grupeve që merreshin me shpërndarjen e lëndëve narkotike në zona të ndryshme të kryeqytetit, përfshirë edhe pranë institucioneve arsimore. Sipas të dhënave të hetimit, grupet vepronin në 8 zona të ndryshme të Tiranës, ndërsa në secilën zonë rreth 4 persona merreshin me shpërndarjen e drogës. Për dokumentimin e aktivitetit, hetuesit përdorën agjentë të infiltruar dhe kryen blerje të stimuluara, përfshirë raste pranë shkollave.
Policia ka dokumentuar me pamje filmike edhe raste të dorëzimit të dozave pranë dyerve të shkollave, përfshirë raste ku blerësit ishin të mitur. Shpërndarja dyshohet se kryhej pranë shkollave “Sami Frashëri”, “Ismail Qemali”, “Cajupi”, “Ekonomiku Profesional”, “Hoteleri-Turizmi” dhe “Qemal Stafa”.
Për të shmangur identifikimin nga policia, të dyshuarit përdornin mjete të ndryshme transporti për të realizuar porositë dhe dorëzimet. Mes tyre përmenden monopatinat, motorët e picave dhe taksitë. Në kuadër të operacionit janë lëshuar gjithsej 52 urdhër-arreste me vendim gjykate.
Nga këto, 31 persona janë arrestuar, ndërsa 14 të tjerë janë shpallur në kërkim. Sipas policisë, 7 persona të tjerë të dyshuar si pjesë e të njëjtit aktivitet kriminal ishin arrestuar më herët. Hetimet vijojnë për zbardhjen e plotë të aktivitetit dhe identifikimin e personave të tjerë që mund të jenë të përfshirë.