Një investigim i gazetës britanike “The Sun” ngre shqetësime për mënyrën se si grupet e krimit të organizuar po zgjerojnë bashkëpunimin e tyre në qytete të ndryshme të Britanisë. Sipas shkrimit, grupet kriminale po krijojnë lidhje të reja për të kontrolluar tregjet e drogës, ndërsa përplasjet e drejtpërdrejta po zëvendësohen gjithnjë e më shumë nga marrëveshjet dhe partneritetet.
Ish-detektivi Lee Davies, i cituar nga gazeta, thotë se peizazhi i krimit të organizuar në Britani ka ndryshuar ndjeshëm gjatë dy dekadave të fundit. Sipas tij, grupet shqiptare luajtën një rol të rëndësishëm në këtë ndryshim, duke krijuar lidhje me rrjete të tjera dhe duke u fuqizuar në tregun e kokainës.
Davies pretendon se grupet kriminale shqiptare arritën të ndërtonin marrëdhënie me organizata të tjera kriminale, duke favorizuar bashkëpunimin dhe ndarjen e fitimeve në vend të luftës për territore. Sipas tij, kjo strategji u lejon grupeve të shmangin vëmendjen e policisë dhe të ruajnë aktivitetin e tyre kriminal.
Në fokus të investigimit është edhe mungesa e burimeve për hetime afatgjata. Ish-shefi i detektivëve Mark Griffin paralajmëron se policia britanike po përballet me vështirësi për të zhvilluar operacione të fshehta që mund të zgjasin me vite. Ai thotë se forcat e rendit shpesh detyrohen të merren me pasojat e krimit, si të shtënat me armë dhe sulmet me thikë, në vend që të ndjekin për një kohë të gjatë drejtuesit e rrjeteve kriminale.
Një tjetër shqetësim i ngritur nga “The Sun” është shfrytëzimi i fëmijëve dhe personave vulnerabël. Fenomeni “county lines”, ku të rinjtë përdoren për shpërndarjen e drogës, dhe “cuckooing”, ku banesat e personave vulnerabël shfrytëzohen për veprimtari kriminale, përmenden si dy nga format e këtij shfrytëzimi.
Investigimi e shtrin problemin përtej Londrës, duke përmendur qytete të ndryshme britanike ku aktiviteti i grupeve kriminale është shoqëruar me dhunë, armë dhe trafik droge. Sipas ekspertëve të cituar nga gazeta, lidhjet mes grupeve po e bëjnë më kompleks për autoritetet identifikimin dhe goditjen e niveleve të larta të krimit të organizuar.