Këshilli i Ministrave ka miratuar disa vendime për shpronësimin, për interes publik, të pronarëve të pasurive të paluajtshme që preken nga projekte infrastrukturore në Elbasan, Vlorë dhe Tiranë. Për projektin “Zgjerim i rrugës Elbasan – Qafëthanë (faza VI)”, shpronësimi bëhet në favor të Autoritetit Rrugor Shqiptar, ndërsa pronarët do të kompensohen në vlerë të plotë për pasuritë e llojit “arë”, “truall”, “pemëtore” dhe “ndërtesë”.
Vlera e përgjithshme e kompensimit për këtë projekt është 140.34 milionë lekë. Shpronësimi duhet të përfundojë brenda tre muajve nga hyrja në fuqi. Një tjetër vendim lidhet me projektin “Pastrimi i kolektorit nga rruga ‘Demokracia’ deri te rruga ‘Vasil Puka’, Bashkia Vlorë”.
Shpronësimi bëhet në favor të Bashkisë Vlorë, ndërsa pronarët e pasurive të prekura të llojit “truall” dhe “ndërtesë” do të kompensohen me një vlerë të përgjithshme prej 1.73 milionë lekësh. Ky fond do të përballohet nga buxheti i Bashkisë Vlorë, ndërsa edhe në këtë rast afati i përfundimit të shpronësimit është tre muaj nga hyrja në fuqi e vendimit.
Këshilli i Ministrave ka miratuar gjithashtu ndryshime dhe shtesa në vendimin për shpronësimin e pronarëve të pasurive të prekura nga realizimi i projektit “Ndërtim rruga Kashar – nyja Vaqar, fazat I dhe II”. Me ndryshimet e miratuara, vlera e përgjithshme e kompensimit rritet nga 126.28 milionë lekë në 129.83 milionë lekë. Shpronësimi përfshin pasuri të llojit “arë”, “truall”, “vreshtë”, “pemëtore”, “ullishte” dhe “ndërtesë”.