Diplomati i lartë amerikan Marco Rubio ndodhet të mërkurën në Athinë, në prag të një "dialogu strategjik" me këtë vend anëtar të NATO-s mbi sigurinë rajonale dhe atë energjetike, njoftoi Departamenti i Shtetit. Luftërat në Iran dhe Ukrainë kanë nxjerrë në pah brishtësinë e zinxhirëve të furnizimit me energji dhe Greqia po pozicionohet për t'u bërë një nyje kyçe në Evropën Juglindore për transportin e gazit natyror. "Greqia është një aleat shumë i rëndësishëm i SHBA-së," u tha Rubio gazetarëve para vizitës. "Është një vend ku ne kemi jo vetëm prani ushtarake, por edhe lidhje të forta ekonomike," tha ai. Në shkurt, në Athinë u nënshkruan marrëveshje koncesionare që i jepnin një konsorciumi të udhëhequr nga gjiganti amerikan i energjisë "Chevron" të drejtat ekskluzive për eksplorimin dhe shfrytëzimin e hidrokarbureve në zonat detare në jug të Peloponezit dhe Kretës. Në prill, u nënshkrua një marrëveshje tjetër me një konsorcium të udhëhequr nga "ExxonMobil" për shpime eksploruese në pjesën veriperëndimore të Detit Jon, të cilat pritet të fillojnë në vitin 2027. Si një blerës afatgjatë i armatimeve amerikane, Greqia pritet gjithashtu të blejë 20 avionë luftarakë F-35, ndërsa trajnimi i pilotëve do të nisë në vitin 2027. Momenti kryesor i vizitës së Rubios pritet të jetë fjalimi i tij nga Pnyx, një kodër pranë Akropolit që shërbente si vendi i asamblesë parlamentare të demokracisë së lashtë athinase. "Sekretari Rubio do të mbajë një fjalim nga vendlindja e qytetërimit perëndimor, ku do t'u bëjë thirrje amerikanëve dhe evropianëve që të bashkohen në një ripërtëritje të madhe të frymës perëndimore, një trashëgimi që shtrihet nga Athina dhe Roma, te bota e krishterë e deri te themelimi i Shteteve të Bashkuara", thanë zyrtarët. "Ai do t'u bëjë thirrje aleatëve në Perëndim që t'u bashkohen Shteteve të Bashkuara në refuzimin e rënies, në mbrojtjen e trashëgimisë sonë të përbashkët dhe në përballjen me një epokë të re të konkurrencës mes fuqive të mëdha," thanë ata. Në shkurt, Rubio i bëri thirrje Evropës t'u bashkohet Shteteve të Bashkuara për të "penguar forcat e fshirjes së qytetërimit, të cilat sot kërcënojnë si Amerikën, ashtu edhe Evropën". Në konferencën e sigurisë në Mynih ai kritikoi emigrimin masiv dhe atë që e cilësoi si çindustrializim të perëndimit. Ndërkohë mbi 2 mijë protestues u mblodhën në qendër të athinës të martën për të protestuar kundër vizitës. Qendra e qytetit u mbyll për trafikun ndërsa prania e policisë ishte e shtuar.