Punimet për ndërtimin e dy fazave të para të Bypass-it të Elbasanit kanë hyrë në zbatim, pas lidhjes së kontratave përkatëse. Ministri i Infrastrukturës dhe Energjisë, Enea Karakaçi, deklaroi se puna në terren ka nisur dhe po vijon me ritme të mira. Sipas ministrit, dy fazat e para janë veçanërisht të rëndësishme pasi lidhen me segmentin ku përfundon autostrada Tiranë-Elbasan dhe ku përqendrohet një pjesë e konsiderueshme e trafikut.
“Kontratat për dy fazat e para janë lidhur dhe vijon avancimi i punimeve”, u shpreh Karakaçi pas mbledhjes së qeverisë, duke theksuar se situata po ndiqet nga afër edhe në terren. Një element që pritet të lehtësojë ecurinë e projektit është fakti se për këto dy faza nuk parashikohen shpronësime të mëdha. Një pjesë e procedurave të shpronësimit është përfunduar më herët, duke shmangur vonesa të mëtejshme në zbatimin e projektit.
Karakaçi bëri të ditur gjithashtu se projekti nuk do të kufizohet vetëm në dy fazat e para. Financimi për fazat pasuese të Bypass-it të Elbasanit është parashikuar të vijojë edhe në buxhetin e vitit 2027. Sipas ministrit, bypass-i përbën një nyje të rëndësishme të infrastrukturës rrugore shqiptare, për shkak të rolit që pritet të ketë në përmirësimin e qarkullimit dhe lidhjen e juglindjes me pjesën jugore të vendit.
“Edhe në buxhetin e vitit 2027 do të vazhdojmë me financimin e fazave pasuese të Bypass-it të Elbasanit”, deklaroi Karakaçi. Projekti synon të përmirësojë qarkullimin në aksin Elbasan-Tiranë dhe të reduktojë ngarkesën e trafikut në zonat urbane, duke e kthyer Bypass-in e Elbasanit në një prej projekteve të rëndësishme të infrastrukturës rrugore në vend.