SPAK ka çuar për gjykim në Gjykatën e Posaçme katër persona të dyshuar për rrëmbimin dhe vrasjen e Renis Dobrës, ngjarje e ndodhur më 8 korrik 2025. Në dosjen e dërguar për gjykim janë tre vëllezërit Fation, Krist dhe Aleksandër Bushgjokaj, si dhe bashkëpunëtori i tyre në krim Petrit Hoxha, i njohur si Çakraj. Atra akuzohen për rrëmbim, në bashkëpunim si grup i strukturuar kriminal, si edhe për krijim dhe kryerje të veprave penale në kuadër të grupit të strukturuar kriminal. Sipas hetimit, katër të dyshuarit kanë ndjekur dhe më pas kanë bllokuar automjetin e Dobrës në aksin Klos-Zenisht. Pamjet e kamerave të sigurisë dhe të dhënat GPS kanë ndihmuar hetuesit të rindërtojnë lëvizjet e automjeteve. Pranë “Urës së Matit”, Renis Dobra është pikasur duke udhëtuar me automjetin e tij Benz, ndërsa është ndjekur nga një automjet, ku ndodheshin Petrit Hoxha dhe Kristë Bushgjokaj. Dyshohet se ata kanë sinjalizuar Fation dhe Aleksandër Bushgjokajn, të cilët po lëviznin me një Range Rover.