Kreu i PD, Sali Berisha, ka reaguar për miratimin në Kuvend të Reformës Territoriale.
Në një konferencë për mediat, Berisha tha se reforma u “miratua me mandatet e krimit dhe se asgjësimi i 15 bashkive është një krim kolektiv”.
Berisha deklaroi se opozita do të vijojë betejën ligjore kundër kësaj reforme dhe njoftoi se ka nisur mbledhja e firmave për referendum dhe se nuk përjashtohet asnjë mundësi ligjore, përfshirë dërgimin e çështjes në Gjykatën Kushtetuese.
“Mbrëmë pas mesnate, në një akt flagrant antikombëtar, antiqytetar, kriminal, me pengmarrje dhe ryshfet, mandatet e krimit u hodhën si shigjeta kundër qytetarëve të 15 bashkive të vendit, për asgjësimin e tyre. Deputetët e partisë së krimit, në unison, shkelmuan interesat e zgjedhësve të tyre.
Të marrë peng nga korrupsioni, vjedhjet dhe plaçka që kanë siguruar përmes mandatit të tyre, ata votuan në një krim kolektiv për asgjësimin e 15 bashkive.
Theksoj edhe një herë se, për Shqipërinë, një vend me nevojë jetike për zhvillim, njësitë e qeverisjes vendore janë investitorët kryesorë në zonat ku jetojnë komunitetet”, tha Berisha.
“S’ka ndodhur kurrë një gjë e tillë, më inkriminuese se ajo e mbrëmshme, rreth orës 01:30. Duke dënuar këtë akt, PD-ja deklaron se do të vazhdojë çdo betejë ligjore kundër zbatimit të vendimit për 15 bashkitë. Kemi nisur mbledhjen e firmave për referendum. Do të studiojmë të gjitha modalitetet e referendumeve lokale dhe kombëtare.
Kemi bindjen më të thellë se po mbrojmë interesat e qytetarëve shqiptarë nga një bandë, nga një organizatë kriminale që quhet parlament. Nuk përjashtohet asnjë mundësi ligjore për të paraqitur padi në Gjykatën Kushtetuese”, tha ai.
