Shkodra pritet të përfitojë një ndërhyrje të rëndësishme urbane, me fokus gjelbërimin, mobilitetin dhe përmirësimin e hapësirave publike. Kryetari i Bashkisë Shkodër, Benet Beci, ka bërë të ditur publikimin e garës për projektimin e “Kopshtit Linear dhe Aksit Multimodal Veri–Jug”, një projekt që shtrihet nga Sheshi Demokracia, i njohur më parë si Sheshi 5 Heronjtë, deri te rrethrrotullimi i Bypass-it. Ndërhyrja përfshin Bulevardin Studenti, Sheshin Parrucë, Bulevardin Zogu I, zonën e Xhabijes, Rrugën Mbreti Gent, si dhe sheshet dhe kryqëzimet përgjatë këtij aksi. Sipas Becit, synimi është transformimi i kësaj hapësire në një bosht urban më të gjelbër, më të sigurt dhe më funksional, duke krijuar më shumë hapësirë për këmbësorët dhe biçikletat, si dhe kushte më të mira për transportin publik.
Postimi i plotë
Shkodra drejt një transformimi të ri urban! Sot është publikuar gara për projektimin e një prej ndërhyrjeve kryesore urbane për Shkodrën: “Kopshti Linear dhe Aksi Multimodal Veri–Jug”, nga Sheshi Demokracia (ish-5 Heronjtë) deri te rrethrrotullimi i Bypass-it.
Projekti përfshin Bulevardin Studenti, Sheshin Parrucë, Bulevardin Zogu I, zonën e Xhabijes, Rrugën Mbreti Gent, si dhe sheshet dhe kryqëzimet përgjatë gjithë këtij aksi. Synimi ynë është ta transformojmë në një bosht urban më të gjelbër, më të sigurt dhe më funksional për qarkullimin, me më shumë hapësirë për këmbësorët dhe biçikletat dhe me kushte më të mira për transportin publik.
Në këndvështrimin tim, ky aks ka një rëndësi të veçantë për Shkodrën, sepse lidh qendrën dhe zonën historike të qytetit me Parkun e ri në hyrje të tij, duke krijuar një vazhdimësi të natyrshme urbane dhe duke forcuar më tej identitetin e Shkodrës si qytet historik, i gjelbër dhe turistik.
Porta e Alpeve financohet nga Qeveria Shqiptare dhe Banka Evropiane e Investimeve, zbatohet nga Fondi Shqiptar i Zhvillimit dhe ka si partner kryesor Bashkinë Shkodër.
Ky është vetëm fillimi. Së shpejti do të vijojmë edhe me projekte të tjera të rëndësishme për qytetin: përmirësimin rrënjësor të transportit publik, përfundimin e rrugës së re të Velipojës, itinerarin e biçikletave përgjatë Liqenit të Shkodrës, Bunës deri në Adriatik dhe sistemin e ri muzeal të qytetit.
