Presidenti amerikan Donald Trump bëri një njoftim të papritur të dielën për një armëpushim energjetik mes Rusisë dhe Ukrainës, i cili sipas tij hynte në fuqi "menjëherë", por lideri ukrainas Volodymyr Zelenski tha se ishte ende në pritje të detajeve të marrëveshjes. Nuk pati asnjë reagim nga Moska lidhur me njoftimin për armëpushim, i cili erdhi pas ditësh të tëra presioni të fortë nga Trump që Ukraina të ndalonte sulmet ndaj rafinerive ruse të naftës. Ai i konsideron këto sulme si shkak për rritjen e çmimeve të naftës, gjë që po dëmton Partinë e tij Republikane në prag të zgjedhjeve të ndërmjetme në SHBA muajin e ardhshëm, ndonëse është lufta në Iran ajo që ka rënduar situatën. Në një përkeqësim dramatik të marrëdhënieve, të shtunën Trump e paralajmëroi Zelenskin se "bën mirë ta ndalojë menjëherë" sulmin ndaj rafinerive ruse dhe u bëri thirrje ukrainasve të zgjedhin një lider të ri. Trump tha se Zelenski kishte humbur disa mundësi për të arritur një marrëveshje me Moskën. Ndërkohë, në një postim në platformën e tij "Truth Social" më vonë, Trump njoftoi papritur se Ukraina dhe Rusia kishin rënë dakord për një armëpushim energjetik, por nuk dha detaje të mëtejshme. "Duke filluar menjëherë, ka një ARMËPUSHIM ENERGJETIK në luftën mes Rusisë dhe Ukrainës. Të dyja palët kanë rënë dakord. Mos e shkelni!" shkroi Trump.