Kryeministri Edi Rama ka ndarë pamje nga mbërritja në Qendrën Europiane të Konventave për mbylljen e negociatave për Kapitullin e 20-të ”Ndërmarrjet dhe Politikat Industriale”. Rama deklaroi se Shqipëria synon të mbyllë disa kapituj të tjerë të negociatave për anëtarësimin në Bashkimin Evropian deri në fund të këtij viti, duke theksuar se procesi i integrimit do të vijojë sipas afateve të parashikuara.
Në prononcimin për mediat pas mbërritjes së tij, Rama u shpreh se vendi është rikthyer për të mbyllur një tjetër kapitull të negociatave, duke e konsideruar përparimin drejt anëtarësimit në BE si një objektiv historik. “U kthyem, jemi kthyer për të mbyllur një tjetër kapitull dhe për të rikonfirmuar që përparimi drejt objektivit tonë historik është i pandalshëm”, deklaroi Rama, duke shtuar se kishte zhvilluar edhe disa takime inkurajuese lidhur me hapat e ardhshëm.
Kryeministri Rama: U kthyem, jemi kthyer për të mbyllur një tjetër kapitull dhe për të rikonfirmuar që përparimi drejt objektivit tonë historik është i pandalshëm. Ndërkohë sapo kam kryer disa takime inkurajuese për çka vjen më pas, pra planet janë ambicioze. Brenda këtij viti synojmë të mbyllim edhe më shumë kapituj dhe jam absolutisht i bindur që sa i takon palës sonë, do të jemi në çdo hap plotësisht në përputhje me afatet.
-Zoti Kryeministër sa kapituj do të mbyllen deri në fund të këtij viti?
Kryeministri Edi Rama: Nuk do të thoja shifrat, thjesht po them që sot do të mbyllim edhe një tjetër kapitull që bën katër gjithsej dhe ka mbetur së paku edhe dyfish që pritet të jetë shifra për këtë vit, të paktën për këtë vit, por le të shohim.
