Një konflikt i hershëm mes dy të rinjve, që dikur kanë qenë shokë të afërt, përfundoi në një tentativë vrasjeje brenda një kalçetoje në Shkodër.
K. Fermosi, 25 vjeç, dyshohet se ka shkuar në ambientet e fushës sportive mbrëmjen e 11 tetorit me qëllimin për të vrarë J. Ujkën, 26 vjeç, por tentativa e tij ka dështuar pasi pistoleta me të cilën tentoi ta qëllonte nuk është shkrepur.
Pas ngjarjes, policia e Shkodrës ka identifikuar dhe shpallur në kërkim K. Fermosin, i cili dyshohet se ka tentuar të ekzekutojë me armë zjarri 26-vjeçarin brenda ambienteve të kalçetos.
Ndërkohë, blutë vijojnë punën për lokalizimin dhe kapjen e tij.
Sipas të dhënave paraprake, 25-vjeçari ka hyrë në ambientet e fushës sportive dhe i ka drejtuar armën e zjarrit J. Ujkës, duke tentuar ta qëllojë. Por pistoleta nuk ka shkrepur, duke bërë që tentativa e dyshuar për vrasje të mos përfundonte në tragjedi.
Në ato momente, në kalçeto ndodheshin edhe persona të tjerë, të cilët kanë ndërhyrë duke larguar Fermosin nga vendi i ngjarjes.
Kjo ndërhyrje, së bashku me faktin që arma nuk u shkrep, bëri që J. Ujka t’i shpëtonte mrekullisht asaj që mund të kishte përfunduar në një vrasje. Konflikti nisi 5 vite më parë për një vajzë.
Pas kësaj ngjarjeje dyshohet se fshihet një konflikt i vjetër mes dy të rinjve, të cilët më herët kanë qenë shokë të afërt. Rreth pesë vite më parë, K. Fermosi dhe J. Ujka janë përfshirë në një konflikt për shkak të një vajze.
Në atë kohë, situata mes tyre u mbyll pas ndërhyrjes së dy familjeve, të cilat arritën ta zgjidhnin përplasjen. Megjithatë, duket se marrëdhënia mes dy të rinjve nuk është normalizuar përfundimisht.
Rreth një vit më parë, ata dyshohet se e kanë rihapur konfliktin, duke rikthyer përplasjet mes tyre.
Tashmë, kjo përplasje e vjetër dyshohet se ka arritur deri në përdorimin e armës së zjarrit teksa i dyshuari Fermosi tentoi të vriste J. Ujkën.