Policia gjermane ka nisur një hetim ndaj dy të rinjve të akuzuar se kanë kontrolluar një robot, i cili dyshohet se ka ngacmuar seksualisht një vajzë 16-vjeçare. Policia në Këln ka konfiskuar robotin me ngjyrë të kuqe dhe të artë, i cili dyshohet se ka kapur nga të pasmet një vajzë dhe ka kryer lëvizje shtytëse ndaj saj. Policia e landit të North Rhine Ëestphali-së, deklaroi se pronari 16-vjeçar i robotit dhe shoku i tij 19-vjeçar dyshohet se e kanë transmetuar incidentin drejtpërdrejt në rrjetet sociale dhe e kanë komentuar atë. Sipas një njoftimi të policisë në Facebook, pajisja me lartësi 120 cm iu afrua vajzës nga pas ndërsa ajo ndodhej me miqtë e saj, pak para mesnatës të së shtunës. Vajza ndodhej para një lokali pranë qendrës së qytetit kur ndodhi incidenti, tha policia. Shërbimet e urgjencës u njoftuan dhe adoleshenti së bashku me të riun tjetër, i cili tashmë po hetohet bashkë me të, u gjetën pak më vonë në një bllok ndërtesash aty pranë. Roboti u gjet në pjesën e pasme të një makine. Një fotografi e publikuar nga policia tregonte robotin e sekuestruar, bashkë me dy telefonat celularë të të dyshuarve.