Pamje shqetësuese janë shënuar në ditën e katërt të protestës para Ministrisë së Arsimit, ku një ndërhyrje e policisë ndaj një të riu ka përfunduar me rrëzimin e tij të dhunshëm në tokë.
Siç shihet në videon e fiksuar nga gazetari i ”Koha Jonë” Daniel Muçaku, ngjarja është regjistruar në ”Rrugën e Durrësit”, në një moment tensioni mes protestuesve dhe forcave të rendit. Në pamjet e publikuara, një efektiv policie shihet duke goditur të riun dhe duke e përplasur me forcë përtokë, ndërsa ky i fundit duket i palëvizur në rrugë përpara ndërhyrjes.
Menjëherë pas incidentit, disa efektivë të tjerë afrohen dhe rrethojnë të riun, ndërsa situata në zonë mbetet e tensionuar. Protesta ka vijuar për disa orë, ndërsa gjatë ditës raportohet për shoqërimin e disa personave, kryesisht të rinj. Po ashtu, policia ka përdorur disa herë gaz lotsjellës për të shpërndarë protestuesit.