Sipas një studimi të ri, astronomët që analizojnë yjet që njihen si xhuxhë të bardhë kanë zbuluar për herë të parë një yll, i cili, për syrin e njeriut, do të dukej i gjelbër. Ndërsa te shumica e yjeve ngjyra varet nga temperatura dhe kufizohet në pak nuanca, yjet xhuxhë të bardhë, të cilët janë mbetjet e dendura të yjeve të ngjashëm me Diellin që kanë përfunduar ciklin e tyre jetësor, mund të shkëlqejnë në një gamë të jashtëzakonshme ngjyrash. "Ngjyrat që mund të kenë yjet e zakonshëm janë, në thelb, vetëm portokallia, e bardha ose bluja. Ne zbuluam se, për shumicën e xhuxhëve të bardhë, vlen e njëjta gjë. Por ka raste të veçanta ku fizika në shtresat e jashtme të këtyre yjeve është aq e pazakontë, saqë shkakton devijime mjaft të mëdha në spektrin e tyre," tha Mark Hollands, astrofizikan në Universitetin e Ëarëick-ut në Angli dhe autori kryesor i studimit. Këto devijime vijnë si pasojë e ndërveprimit mes heliumit në atmosferën e tyre dhe gjurmëve të elementeve të tjera. Këto elemente ndryshojnë nga njëri xhuxh i bardhë te tjetri, në varësi të materialeve që kanë ndërvepruar me yllin gjatë ekzistencës së tij.