Qytetet në veri të Italisë, përfshirë kryeqendrën financiare Milano, u prekën nga trazira gjatë fundjavës së kaluar. Edhe pse jo në përmasat e atyre që u panë në Francë, këto trazira gjithsesi tronditën qeverinë e kryeministres Giorgia Meloni, e cila prezantoi masa të reja sigurie gjatë mbledhjes së kabinetit të martën. Ministri i Mbrojtjes, Guido Crosetto, i përshkroi trazirat si një formë të "luftës hibride", të zhvilluar përmes platformave të mediave sociale si TikTok, YouTube dhe rrjeteve të tjera në internet. "Ngjarjet në Milano dhe gjetkë në Itali janë thelbësisht të ndryshme nga ato të periudhave të tjera," shkroi Crosetto në platformën X. "Perëndimi ende nuk e ka kuptuar këtë dhe nuk ka ndërmarrë asnjë veprim domethënës si kundërpërgjigje." Në rrugën qendrore të Milanos, dyqanet e markave që u vunë në shënjestër gjatë trazirave, u rihapën të martën, por dritaret e tyre mbetën të mbuluara me dërrasa. Dyqanet e mallrave luksoze i kishin vendosur sërish produktet në vitrinat e tyre, pasi i kishin hequr përkohësisht për arsye sigurie. Ndërkohë në jug të italisë vazhdojnë trazirat. Shoferët e kamionëve kanë bllokuar rrugët ndërsa shumë supermarkete kanë mbetur me raftet e zbrazura dhe nuk kanë mundësi furnizimi. Në rajone si Pulia dhe Kalabria, kjo ka cuar në mungesë mallrash. Protestat kanë në shënjestër rritjen e konsiderueshme të cmimit të karburantit por edhe koston e lartë të jetesës apo taksat rrugore. Bllokimet kanë shkaktuar radhë të gjata trafiku edhe në autostrada ndërsa janë bllokuar rafineritë dhe rrugët hyrëse drejt porteve.