Ministri i Mbrojtjes, Ermal Nufi ka përcjellë kontingjentin e parë shqiptar të helikopterëve që do t’i bashkohet misionit të NATO-s, KFOR, në Kosovë. Në Bazën Ajrore të Farkës u zhvillua ceremonia e përcjelljes së 13 efektivëve të Forcave të Armatosura, të cilët do të shërbejnë në bazën ushtarake amerikane “Bondsteel”, duke shënuar një moment të rëndësishëm për Forcën Ajrore dhe zgjerimin e kontributit të Shqipërisë në operacionet ndërkombëtare.
Gjatë ceremonisë, ministri Nufi e cilësoi këtë angazhim si dëshmi të profesionalizmit të ushtarakëve shqiptarë dhe të përkushtimit të Shqipërisë ndaj detyrimeve të saj si aleate e NATO-s. “Kontingjenti që përcjellim sot është pjesë e kësaj përpjekjeje. Ai dëshmon se Forca Ajrore po zgjeron rolin e saj dhe se Forcat tona të Armatosura po konsolidojnë kapacitetet për të përmbushur detyra gjithnjë e më të rëndësishme në kuadër të NATO-s”, u shpreh ministri.
Ai cilësoi ndër të tjera se kontributi i Shqipërisë për sigurinë ndërkombëtare nuk kufizohet vetëm në këtë mision, por ai është pjesë gjithashtu e operacioneve të NATO-s, Bashkimit Evropian dhe të Kombeve të Bashkuara. Të pranishëm në këtë ceremoni ishin të pranishëm Shefi i Shtabit të Përgjithshëm të Forcave të Armatosura, Gjenerallejtënant Arben Kingji, Komandanti i Forcës Ajrore, Gjeneral Brigade Voci, komandantë dhe drejtues të Forcave të Armatosur, si dhe familjarë të efektivëve që nisen me mision.
”Për Shqipërinë, ky mision ka një rëndësi të veçantë, jo vetëm për lidhjen vëllazërore dhe historike me Kosovën, por edhe sepse siguria dhe stabiliteti i Kosovës lidhen drejtpërdrejt me paqen dhe sigurinë e Shqipërisë dhe gjithë rajonit tonë, Në këtë kuadër, angazhimi ynë në KFOR mbetet i palëkundur! Ne jemi plotësisht të përkushtuar që të vijojmë të përmbushim përgjegjësitë tona me seriozitet, në bashkëpunim të ngushtë me aleatët dhe partnerët tanë, në shërbim të sigurisë së përbashkët”,-tha Nufi.
