Avokati i Popullit ka publikuar gjetjet e monitorimit të kryer në komisariatet e policisë, duke evidentuar problematika që lidhen me trajtimin e personave të shoqëruar dhe të arrestuar, kushtet e qëndrimit dhe respektimin e të drejtave të tyre.
Një nga shqetësimet e ngritura lidhet me mungesën e numrave identifikues për efektivët që kryejnë arrestimet, si dhe për automjetet policore të përdorura gjatë operacioneve. Gjithashtu, është kërkuar ruajtja e pamjeve filmike për të ndihmuar në vijimin e hetimeve, si dhe dokumentimi i rasteve të mundshme të dhunës dhe trajtimit të personave të ndaluar.
Gjatë monitorimit janë konstatuar edhe problematika në kushtet e mbajtjes, ku të miturit rezultojnë të qëndrojnë në të njëjtat ambiente me të rriturit. Po ashtu, është evidentuar mbipopullimi në disa prej ambienteve të komisariateve.
Një tjetër shqetësim i rëndësishëm është moslejimi i të miturve për të komunikuar me familjarët, avokatët apo psikologët, duke ngritur pikëpyetje mbi garantimin e të drejtave të tyre gjatë qëndrimit në ambientet e policisë. Avokati i Popullit ka bërë të ditur se çdo shkelje e konstatuar do t’u përcillet Prokurorisë dhe institucioneve të tjera kompetente për shqyrtim dhe hetim të mëtejshëm.
𝗔𝘃𝗼𝗸𝗮𝘁𝗶 𝗶 𝗣𝗼𝗽𝘂𝗹𝗹𝗶𝘁 𝗽𝘂𝗯𝗹𝗶𝗸𝗼𝗶 𝘀𝗼𝘁 𝗴𝗷𝗲𝘁𝗷𝗲𝘁 𝗲 𝗺𝗼𝗻𝗶𝘁𝗼𝗿𝗶𝗺𝗶𝘁 𝘁𝗲̈ 𝗽𝗿𝗼𝘁𝗲𝘀𝘁𝗲̈𝘀 𝗻𝗲̈ 𝟮𝟰 𝗼𝗿𝗲̈𝘁 𝗲 𝗳𝘂𝗻𝗱𝗶𝘁:
💬U administruan 6 ankesa për pretendime dhune gjatë ditës së 20 tetorit, të gjitha në Bllokun e Sigurisë.
💬Pamjet filmike të publikuara nga protesta ngrenë shqetësime për tërheqje zvarrë dhe goditje me shkopinj gome.
💬Në Spitalin e Traumës, një person i arrestuar qëndronte ende i shtruar, i prangosur në krevat, ndërsa një punonjës policie ishte në dhomë. Ai pretendoi se u dhunua gjatë arrestimit dhe kishte dëmtim të madh në sy.
💬Gjatë inspektimit në Bllokun e Sigurisë u konstatua se në dhoma të destinuara për një person qëndronin 3 deri 4 persona. Sipas raportimit, të paktën dy persona flinin në dysheme.
💬Kapaciteti zyrtar i Bllokut të Sigurisë është 67 persona, ndërsa ne gjetëm aty 118 të arrestuar.
💬Gjatë monitorimit morëm kontakt me 6 të mitur. Por në Bllokun e Sigurisë, ku mbahen, nuk arritëm të identifikojmë dhomë të veçantë për fëmijët. Ankesat e administruara lidheshin me kufizimet për kontaktin me familjen dhe avokatin, si dhe mungesën e psikologut gjatë marrjes në pyetje.
💬Ne dënojmë çdo akt dhune, nga kushdo që vjen. Policia ka detyrimin të garantojë sigurinë publike dhe, në çdo ndërhyrje, të përdorë forcën vetëm kur është e domosdoshme dhe në mënyrë proporcionale.
𝗡𝗴𝗮 𝗣𝗼𝗹𝗶𝗰𝗶𝗮 𝗲 𝗦𝗵𝘁𝗲𝘁𝗶𝘁 𝗸𝗲̈𝗿𝗸𝗼𝗷𝗺𝗲̈:
• Ruajtjen e menjëhershme të pamjeve filmike të protestës, të komisariateve dhe të Bllokut të Sigurisë, dhe instalimin e kamerave në çdo ambient shoqërimi dhe zyrë, me ruajtje të pamjeve.
• Vënien në dispozicion të urdhrave, regjistrave dhe të dhënave për bazën e shoqërimit, kohëzgjatjen dhe identitetin e punonjësve.
• Identifikim të detyrueshëm të çdo punonjësi dhe automjeti në çdo operacion.
• Dokumentimin e garancive për 6 të miturit dhe ndarjen e tyre nga të rriturit.
• Sqarim mbi prangosjen e personit të shtruar në spital: kush e vendosi, arsyet dhe kohëzgjatja.
𝗡𝗴𝗮 𝗠𝗶𝗻𝗶𝘀𝘁𝗿𝗶𝗮 𝗲 𝗕𝗿𝗲𝗻𝗱𝘀𝗵𝗺𝗲 𝗸𝗲̈𝗿𝗸𝗼𝗷𝗺𝗲̈:
• Të merren masa që Blloku i Sigurisë të funksionojë me kapacitetin normal prej 67 personash dhe personat e tjerë të mbipopulluar të sistemohen në ambientet të tjera që plotësojnë standardet.
-tha ndër të tjera, komisioneri Ahmet Prençi, drejtues i Mekanizmit Kombëtar për Parandalimin e Torturës.
Avokati i Popullit do të ketë komunikime periodike me median dhe publikun në përputhje me dinamikën e protestave.