Kryetari i Sindikatës së Punonjësve të Universiteteve të Shqipërisë, Aleksandër Kovaçi ka reaguar ashpër ndaj ndërhyrjeve të policisë gjatë protestave përpara Ministrisë së Arsimit, duke denoncuar përdorimin e forcës ndaj studentëve, pedagogëve dhe qytetarëve që u janë bashkuar tubimeve. Kovaçi bëri të ditur se gjatë protestave janë përdorur edhe plumba gome, duke treguar rastin e një anëtari të stafit akademik, i cili mbeti i dëmtuar pranë syrit.
“Një nga anëtarët e stafit tonë pësoi një lëndim afër syrit dhe është sot akoma me fashim nga dëmtimi prej plumbave të gomës”, deklaroi Kovaçi, duke shtuar se gjendja shëndetësore e pedagogut është e mirë, pasi ka marrë trajtim në spital dhe vijon të jetë pjesë e protestave. Kreu i sindikatës theksoi se përdorimi i ujit me presion dhe gazit lotsjellës nuk ka kursyer as trupën akademike dhe intelektualët, të cilët kanë dalë në rrugë për të mbështetur protestën.
“Nuk u kursye as ndaj pedagogëve e intelektualëve që gjendeshin në shesh”, u shpreh ai, duke nënvizuar se pjesëmarrja në protesta nuk kufizohet vetëm te studentët apo grupet e konsideruara më rebele, por përfshin edhe mësues, profesorë dhe qytetarë.
Duke komentuar thirrjet e kryeministrit Edi Rama për dialog me përfaqësuesit e universiteteve, Kovaçi i cilësoi ato si një përpjekje për të dobësuar dhe përçarë lëvizjen studentore. “Ftesa e Ramës për dialog është thjesht një kurth për studentët. Nuk mund të ketë dialog kur dhuna vijon në terren”, deklaroi kreu i sindikatës.
Sipas tij, nuk mund të flitet për një proces dialogu ndërsa protestuesit përballen me ndërhyrje policore dhe përdorim të mjeteve të forcës. Në përfundim, Kovaçi rikonfirmoi mbështetjen e sindikatës dhe të trupës pedagogjike për bojkotin universitar dhe protestat e të rinjve, duke theksuar se pedagogët nuk do të qëndrojnë të shkëputur nga kërkesat dhe reagimi i studentëve.