Kryetari i PD, Sali Berisha, akuzoi kryeministrin Edi Rama se organizoi tentativën për djegien e selisë së Partisë Demokratike, me qëllim manipulimin e opinionit publik dhe largimin e vëmendjes nga akuzat për korrupsion ndaj qeverisë. Në një prononcim për mediat, Berisha deklaroi gjithashtu se Forumi Rinor i PD-së ishte ndër iniciatorët e protestës studentore dhe se opozita do ta mbështesë atë plotësisht.
I pyetur se përse PD përfshihet në protestë, ndërkohë që studentët kanë bërë edhe thirrje kundër tij, Berisha tha se protesta është e studentëve dhe gjimnazistëve, por theksoi se Partia Demokratike ka qenë e angazhuar që në nisjen e saj.
Ai pretendoi se Rama ka tentuar të krijojë përshtypjen se protesta drejtohet nga opozita dhe ngriti akuza për organizimin e sulmeve ndaj selisë së PD-së.
“Pra, Rama organizoi në mendjen e tij, djegien e dy selive. Ndërkohë selinë e vet e kishte mbrojtur, por tek selia e Partisë Demokratike refuzoi të vijë njeri”, deklaroi Berisha.
Kryetari i PD-së siguroi se deputetët, drejtuesit dhe strukturat e partisë do të vijojnë të qëndrojnë në krah të studentëve dhe qytetarëve që protestojnë kundër qeverisë.a.b
