Cristian Chivu e ka bërë sërish, dhe nuk është hera e parë. Interi ka shënuar rikthimin e radhës, duke kaluar nga disavantazhi 0-1 në fitoren 2-1, këtë herë kundër Fiorentinës, falë një penalltie në minutën e 97-të. Kjo ndodhi pasi më herët iu mohua një penallti e qartë për Thuram. Chivu theksoi: “Ishim më të fortë se padrejtësitë, ato na dhanë forcë. Edhe pse nuk dua të shoh askënd që qan për gabime arbitrare…”
Trajneri Chivu shpjegoi se skuadra e tij pësoi gol nga një goditje prej 30 metrash, por nuk kishte asgjë për t’u ankuar për cilësinë e lojës apo vendosmërinë e treguar. Ai vlerësoi se në fund u shpërblyen, pasi pavarësisht disavantazhit, ruajtën qetësinë dhe kthjelltësinë. “Përgëzoj djemtë e mi, ata krijuan dhe u përpoqën të merrnin fitoren. Sot do të kisha thënë se do ta kishim merituar edhe po të kishim humbur, betohem,” shtoi ai.
Lidhur me zgjedhjen e dy sulmuesve, Chivu sqaroi se ata ishin pozicionuar më gjerë. “Bonny është një lojtar që nuk jep referenca, ndërsa Pio mbahej nga mbrojtësit e tyre. Ne zgjodhëm të jepnim më shumë dinamizëm dhe duele një kundër një në të dyja anët. Futja e Lavellit ishte gjithashtu për të hapur më shumë zonën e penalltisë,” detajoi trajneri. Ai theksoi besimin e palëkundur të ekipit deri në fund, duke shtuar se shpërblehesh pothuajse gjithmonë për atë që shpreh në fushë.
Chivu shprehu kënaqësinë për reagimin e skuadrës, duke theksuar se episodet e caktuara dhe padrejtësitë nuk i rrëzuan. Ai përmendi se skuadra ka rikuperuar trembëdhjetë pikë nga situata disavantazhi këtë sezon, duke theksuar se “mjafton të mos dorëzohesh dhe të mbash të njëjtin mentalitet.” Ai e mbylli duke iu referuar protestave për penalltinë e mohuar: “Kam thënë gjithmonë se ndeshjet zgjasin 90 minuta, nuk dua të shoh njerëz që ankohen për vendimet arbitrare. Dua të shoh njerëz që besojnë dhe reagojnë. Sigurisht, edhe unë do të doja të mos vuanim, por futbolli është i tillë.”
Marrë nga La Gazzetta dello Sport