Edhe ditën e sotme seanca plenare në Kuvend ka nisur me kaos dhe tensione.
Sapo kryeparlametari Niko Peleshi filloi të lexonte rendin e ditës, deputetët e PD nisën të godasin tavolinat e tyre dukë bërë zhurmë.
Tensionet janë përshkallëzuar më tej, kur deputetët demokratë kanë bllokuar foltoren e Kuvendit, duke penguar vijimin normal të seancës.
Përballë tyre, efektivët e Gardës së Republikës krijuan një kordon në sallë, duke u vendosur përpara deputetëve të opozitës.
Sapo mori fjalën e tij, kreu demokrat Sali Berisha u shpreh se deputetët socialistë meritonin plumbat e gomës dhe gazin lotsjellës të hedhur në protestë dhe menjëherë, kryetari i Kuvendit, Niko Peleshi, i hoqi fjalën për seancën e sotme.
Gjatë tensioneve, Peleshi ka ndërprerë dy herë seancën.
Por edhe pas nisjes së seancës për herë të tretë tensionet u shtuan edhe më tej kur deputetët e opozitës ndezën flakadanë e hodhën tymuese në sallë.
Ndërkohë deputetët e opozitës, Blendi Himçi dhe Ivi Kaso, Bledion Nallbati, Xhelal Mziu janë përjashtuar nga seanca plenare e Kuvendit, pasi ishin ata që hodhën flakadanë dhe tymuese.
Pas kësaj situate, Peleshi kaloi në votimin e projketligjeve pa diskutim.
