Në një nga takimet e tij të fundit elektorale përpara zgjedhjeve të rëndësishme të mesit të mandatit të 3 nëntorit, Donald Trump u shfaq optimist për rezultatin e republikanëve, pavarësisht sondazheve, të cilat parashikojnë se si Dhoma e Përfaqësuesve, ashtu edhe Senati do të fitohen nga demokratët.
Pasi ka zhvilluar 26 tubime elektorale brenda një muaji, presidenti amerikan 80-vjeçar dha një intervistë, në Shtëpinë e Bardhë, ku foli për garën elektorale, të ardhmen e tij politike dhe mënyrën se si synon të qeverisë nëse demokratët marrin kontrollin e Kongresit.
“Unë mendoj se janë të manipuluara. Besoj se shumë kompani sondazhesh as nuk dërgojnë njerëz për të kryer anketime. Ato marrin një çek të majmë, thonë se kanë 1.000 anketues në të gjithë vendin dhe më pas qëndrojnë ulur pas një tavoline”, u shpreh ai për sondazhet.
Siç shtoi më tej, ai nuk njeh personalisht askënd që të ketë marrë pjesë në një sondazh.
“Ndoshta nuk po pyesin republikanët. Megjithatë, besoj se do të kemi rezultate mjaft të mira. Këtë e kuptoj nga tubimet tona, të cilat janë po aq madhështore sa kanë qenë gjithmonë”, deklaroi ai.
Pavarësisht axhendës së lodhshme, Trump pretendon se nuk ndien lodhje.
“Ka kaq shumë dashuri në sallë apo në stadium, saqë në njëfarë mënyre gjithçka bëhet e lehtë. Në fakt, kjo të jep energji. Sheh dashurinë dhe respektin e njerëzve dhe e di se vendi po ecën kaq mirë. Njerëzit e zakonshëm e dinë këtë”, tha ai.
Ndërkohë, ai shmangu përmendjen e emrit të pasardhësit të preferuar për ta zëvendësuar në presidencë.
“Dua thjesht dikë që do të jetë i jashtëzakonshëm, sepse nëse humbasim përballë demokratëve, ky vend ka marrë fund”, u shpreh ai.
“Ata do të lejojnë miliona emigrantë të paligjshëm të hyjnë në vend. Ata lejuan ardhjen e 25 milionë njerëzve dhe ne kemi dëbuar shumë prej tyre. Kemi dëbuar shumicën e atyre që ishin vërtet të rrezikshëm. Ata duan të rrisin taksat. Duan të bëjnë të gjitha këto gjëra që do ta shkatërrojnë Amerikën. Nëse humbasim Dhomën e Përfaqësuesve, Senatin dhe presidencën, vendi ynë ka marrë fund. Sepse do të duhet të përballesh me njerëz të çmendur”, theksoi ai.
Trump pranoi gjithashtu se do të dëshironte të kandidonte sërish për president, megjithëse Amendamenti i 22-të i Kushtetutës amerikane nuk lejon që i njëjti person të zgjidhet në këtë detyrë më shumë se dy herë.
The post Trump optimist para zgjedhjeve të mesit të mandatit: Sondazhet janë të manipuluara, nuk e ndiej lodhjen appeared first on Euronews Albania.
Burimi: Botë
