Nrecaj: S’mund të hiqet nga barra e drejtësisë as trajtimi i Arlinda Zekajt në Gjykatë

Avokati Anton Nrecaj ka thënë se në rastin e vrasjes së Arlinda Zekajt në fshatin Vitomiricë të Pejës, shkeljet janë të shumta, duke filluar nga Qendra për Punë Sociale. 

Pas këtij rasti u suspenduan 11 zyrtarë policorë përfshirë drejtues të strukturave rajonale dhe të stacionit policor në Pejë. Po atë ditë, Këshilli Prokurorial suspendoi kryeprokuroren e Pejës, Lumturije Vuçetaj, dhe prokuroren e rastit, Arlinda Nallbani-Gacaferri.

Por, avokati Nrecaj ka deklaruar se nuk mund të largohet nga përgjegjësia as trajtimi i Zekajt në Gjykatë sepse kemi të bëjmë me shkelje të urdhrit mbrojtës.

“Gjyqtarët sipas ligjit thirren mbi të drejtën e diskrecionit që të vendosin mbi bazën e vullnetit të lirë se si mendojnë që është më e drejtë. Kjo nuk e largon nga përgjegjësia e moszbatimit të ligjit. Nuk mund të evitohet nga barra e drejtësisë edhe trajtimi në Gjykatë i rastit sepse këtu kemi shkelje të shumta. Kemi situatën kur ka pasur shkelje të urdhrit mbrojtës dhe viktima e ka raportuar policinë, sepse e kemi dëgjuar. Është rasti i parë i Arlindës që është dokumentuar një gjë e tillë. Përndryshe askush nuk do t’i besonte”, ka deklaruar Nrecaj në emisionin “60 Minuta” në KTV.

Arlinda Zekaj u vra më 25 tetor në Vitomiricë të Pejës nga ish-kunati i saj. Ajo u vra pak ditë pasi paralajmëroi me letër institucionet se jeta e saj është në rrezik. Vrasja ndodhi pasi u kthye nga Policia ku e paraqiti ish-bashkëshortin për kanosje.

Edhe Arbëri 1 nën 2026 Një javë nga vrasja në duart e shtetit

Pas këtij rasti, ka dhënë dorëheqje drejtori i përgjithshëm i Policisë së Kosovës, Gazmend Hoxha.

Ndërkohë, në protestat që po mbahen tash e gati një javë, po kërkohet edhe dorëheqja e ministres së Drejtësisë, Donika Gërvalla dhe atij të Punëve të Brendshme, Xhelal Sveçla.