Transferimi në Fier/ Veliaj letër GJKKO-së: Rrëmbim me urdhër të Ramës, duhet hetuar! Gjykata: Ndiq rrugën ligjore! Ndreca: Kallëzim, Gogu shkeli ligjin me takimin! Shtyhet gjyqi

Avokati Plarend Ndreca është shprehur se kryebashkiaku Erion Veliaj ‘s’ka gisht’ në protestat e zhvilluara në Tiranë dhe për këtë sipas tij, ai i ka bërë një ftesë publike kryeministrit Edi Rama që të nxjerrë provat.

Për mediat, pas shtyrjes së seancës në Gjykatën e Posaçme, Ndreca ka zbuluar edhe një diskutim që sipas tij, ai ka bërë me kryeministrin Edi Rama të cilit pretendon se i ka thënë ‘nëse përplasen interesat e mia si një prej drejtuesve politikë të Qarkut Tiranë të PS, apo interesat politike të kryeministrit me interesat ligjore të Veliajt, unë zgjedh të mbrojë interesat ligjore të Veliajt, si personi që ka nevojë sot për mbrojtje ligjore’.

“Jo nuk kam marrë pjesë në protesta, sepse unë jam pjesë e PS. Sigurisht që ka mënyra të ndryshme për të vlerësuar dhe reflektuar mbi protestat. Ajo që duhet thënë në këtë rast me siguri është që Veliaj s’ka asnjë lloj mundësie objektive që të bëjë nga këto akuza. Megjithatë ju jeni të qartë që Veliaj i ka bërë ftesë publike Ramës që ‘nxirrni provat, ndryshe…’. Jemi deri në fund me këto pretendimet jozyrtare. Unë them që kur këto pretendime të bëhen zyrtare, atëherë flasim. Ashtu siç i kam thënë edhe kryeministrit qartësisht dhe po j’ua citoj atë që kam thënë, ‘nëse përplasen interesat e mia si një prej drejtuesve politikë të Qarkut Tiranë të PS, apo interesat politike të kryeministrit me interesat ligjore të Veliajt, unë zgjedh të mbrojë interesat ligjore të Veliajt, si personi që ka nevojë sot për mbrojtje ligjore’. Unë do rreshtohem në mbrojtjen ligjore të Veliajt, pavarësisht se kjo mund të më kushtojë politikisht, por unë jam i vendosur për të ecur në këtë drejtim, sepse unë mendoj që është më e rëndësishme që të mbrohen liritë dhe të drejtat themelore të njeriut. Ka pasur komunikim të vazhdueshëm mes meje dhe kryeministrit. Në momentin e duhur do bëjë publike edhe detajet, por ky nuk është momenti. Çdo veprim që ka ndikuar në veprimtarinë politike të Veliajt, në veprimtarinë institucionale të Veliajt, në të drejtat dhe liritë themelore të Veliajt, me qëllim të fshehtë apo të hapur, sigurisht që do të përdoret në mbrojtje të interesave të Veliajt. Ne e kemi depozituar, avokatët britanikë e kanë depozituar ankimimin në Gjykatën e Strasburgut”, tha mes të tjerash Ndreca.

Avokati i Erion Veliajt, Plarent Ndreca, është shprehur se bashkë me grupin e mbrojtësve të tjerë ligjorë të kryebashkiakut, po shqyrtojnë mundësinë për kallëzim penal, pas transferimit të Veliajt në paraburgimin e Fierit dhe ‘përplasjes’ së pretenduar me ministrin e Drejtësisë, Toni Gogu.

Pyetje: Keni pretenduar dje se keni pasur një telefonatë të tensionuar me kryeministrin Rama. Do të bëni kallëzim penal ndaj ministrit Gogu apo kryeministrit për ndërhyrje, transferim, shantazh, zëvendësim me Arbër Hajdarin?

“Jemi duke vlerësuar ligjërisht, klienti im i ka shkruar drejtpërdrejtë Gjykatës. Siç ju e konstatuat, Drejtoria e Përgjithshme e Burgjeve kur ka marrë vendim për të transferuar Veliajn, nuk e ka njoftuar Gjykatën, në shkelje të detyrimit të saj. Ne si grup ligjor i Veliajt po e vlerësojmë nëse ka vepër penale, cila është vepra penale dhe si do ecet më tej. Unë akoma s’jam takuar me Veliajn për shkak të seancës sot. Në bazë të takimit me Veliajn do bëjmë vlerësimin tonë juridik për këtë çështje. Sigurisht që do vazhdoj të jem avokat i Veliajt. Veliaj më ka informuar dje dhe më ka dhënë edhe shënimet që ka mbajtur pas takimit me ministrin Gogu. Unë dhe një grup i huaj avokatësh po vlerësojmë situatën nga pikëpamja juridike, nëse përbëjnë vepra penale apo jo dhe nëse po, si do procedojmë më tej”, tha mes të tjerash Ndreca.

Avokati mbrojtës i kryebashkiakut Erion Veliaj, Plarent Ndreca, është shprehur se ministri i Drejtësisë, Toni Gogu, e ka takuar Veliajn në paraburgimin e Fierit, në orën 10:30 të darkës, në zyrën e drejtorit të Burgut.

Takimi sipas Ndrecës është zhvilluar ‘kokë më kokë’, gjë që sipas tij është jo-normale, pasi ministri mund të shkojë në një institucion të vuajtjes së dënimit për inspektim, por jo për takime private me të pandehur që janë duke u gjykuar.

Duke folur për mediat pas shtyrjes së seancës gjyqësore ndaj Veliajt në Gjykatën e Posaçme, Ndreca tha se Veliaj ka mbajtur shënime gjatë takimit me Gogun, të cilat sipas avokatit, janë të disponueshme edhe prej tij. Ai tha gjithashtu se Drejtoria e Përgjithshme e Burgjeve kishte detyrim që të njoftonte Gjykatën për vendimin e transferimit të Veliajt nga paraburgimi i Durrësit në atë të Fierit.

“Siç ju e konstatuat, rezultoi në momentin që Drejtoria e Burgjeve ka marrë vendim për të transferuar Veliajn, nuk e ka njoftuar Gjykatën, në shkelje të detyrimit të saj. Gjykata tha se ky material që ka çuar Veliaj do i referohet institucioneve përkatëse. Ne si grup ligjor i Veliajt do e vlerësojmë nëse ka vepër penale. Unë do tentoj ta takoj sot, nëse jo, do të ngelet për nesër.

Veliaj më ka informuar dhe më ka dhënë edhe shënimet që ka mbajtur gjatë takimit me Gogun. Është edhe një grup avokatësh të huaj që po merren me këtë çështje. Sa i përket pjesës së dytë, s’ka asnjë kërkesë të Veliajt për të takuar ministrin e Drejtësisë.

Ministri nuk mund të shkojë në këtë orar, në orën 10:30 të darkës. Ministri i Drejtësisë ka të drejtë të inspektojë kushtet e institucionit, por s’mund të takohë kokë më kokë një të pandehur që është nën gjykim nga gjykata, në zyrën e drejtorit të burgut”, tha mes të tjerash Ndreca.

Kryebashkiaku Erjon Veliaj i ka dërguar këtë të martë një letër Gjykatës së Posaçme, për transferimin e tij nga paraburgimi i Durrësit drejt Fierit.

“Siç jeni vënë në dijeni nga media, Avokati i Popullit dhe Komiteti Shqiptar i Helsinkit, të mërkurën e javës së kaluar jam rrëmbyer nga një “togë” shoqërimi pa m’u treguar urdhri, shkaku pse po lëvizja, ku po shkoja dhe si justifikohet largimi me 100 km të tjera shtesë nga gjykata ku po gjykohem, nga familja ime me 2 të mitur e nënën pensioniste, dhe një Bashkie të Tiranës që drejtoj.

Unë përgjigjen e mora të premten afër mesnatës kur Ministri i Drejtësisë z. Gogu më bëri të qartë në IEVP Fier se jam transferuar me urdhër personal të Kryeministrit Rama; “që të bëj burg tamam” dhe t’ia dijë për nder se prokurorët po bëheshin gati të më shtojnë akuza të tjera, ku më e rënda do qe ajo e prishjes së rendit kushtetues për përkrahjen, organizimin dhe financimin e protestave të Flamingove dhe studentëve, përveçse është po aq e pavërtetë sa dhe Nesti Angoni e Nasta Pëllumbi, është dhe e paligjshme si ndërhyrja e Kryeministrit për transferimin ashtu dhe pretendimi se prokurorët negociojnë me të persekutimin tim të vazhdueshëm dhe shtimin e akuzave.

Kjo kërkon një hetim të plotë, të thellë e të paanshëm. Po e lë në gjykimin tuaj marrjen e masave me besim të plotë.

Ju falënderoj,
Erion Veliaj