Fushata për zgjedhjet afatmesme në Shtetet e Bashkuara të Amerikës pritet të kushtojë rreth 11.9 miliardë dollarë, duke u shndërruar në më të shtrenjtën e regjistruar ndonjëherë. Sipas organizatës OpenSecrets, që monitoron financimin e fushatave politike, shpenzimet e zgjedhjeve të 3 nëntorit 2026 pritet të jenë rreth 30% më të larta se ato të vitit 2022.

Deri në mesin e tetorit, shpenzimet kishin kaluar 9.5 miliardë dollarë, ku pjesën më të madhe e zënë grupet e jashtme politike, të njohura si Super PAC, me rreth 5.5 miliardë dollarë. Këto organizata mund të mbledhin shuma të pakufizuara nga individë dhe kompani, të cilat i përdorin për të mbështetur kandidatët përmes reklamave dhe fushatave politike.

Një nga donatorët më të mëdhenj është miliarderi Elon Musk, i cili ka shpenzuar afro gjysmë miliard dollarë në mbështetje të kandidatëve republikanë. Pjesa më e madhe e parave është kanalizuar përmes America PAC, organizatës politike të krijuar prej tij në vitin 2024. Një fokus i veçantë ka qenë gara për Senatin në Teksas, ku kandidati republikan Ken Paxton përballet me demokratin James Talarico. Vetëm America PAC ka investuar mbi 45 milionë dollarë në këtë garë.

Në krahun demokrat, ndër donatorët kryesorë është ish-kryebashkiaku i Nju Jorkut, Michael Bloomberg, me mbi 60 milionë dollarë kontribute. Ndërsa organizatat e lidhura me miliarderin George Soros kanë dhënë së bashku 102 milionë dollarë për grupet liberale. Edhe në kampin republikan, biznesmenë si Jeff Yass dhe Richard e Elizabeth Uihlein kanë kontribuar me shuma mbi 100 milionë dollarë për kauza politike.

Një tjetër sektor që po rrit ndikimin financiar në këto zgjedhje është industria e kriptomonedhave. Kompanitë Ripple dhe Coinbase kanë kontribuar së bashku me 63 milionë dollarë për Super PAC-et që mbështesin interesat e këtij sektori.

Sipas Brennan Center for Justice, 40 donatorët më të mëdhenj kishin dhënë 2.4 miliardë dollarë deri më 14 tetor, një rekord për këtë fazë të zgjedhjeve afatmesme. Shifrat përfundimtare pritet të publikohen pas përfundimit të procesit zgjedhor, por projeksionet tregojnë se financimi i fushatave në SHBA po arrin nivele të paprecedenta.