Deputeti i Partisë Demokratike, Belind Këlliçi, ka reaguar lidhur me vizitën e ministrit të Drejtësisë, Toni Gogu, në qelinë e Erion Veliajt, duke e cilësuar ngjarjen si një çështje që meriton hetim dhe duke ngritur akuza ndaj kryeministrit Edi Rama.
Në një reagim të tij, Këlliçi pretendon se Gogu është dërguar nga kryeministri për të përcjellë mesazhe kërcënuese te Veliaj.
Sipas tij, vizita e një ministri në një qeli, në orët e vona të natës, ngre pikëpyetje serioze dhe mund të përmbajë elemente të veprës penale.
Këlliçi e lidh këtë episod me akuzat e tij të mëparshme për marrëdhëniet e kryeministrit me persona të përfshirë në afera të dyshuara kriminale dhe korruptive. Ai përmendi gjithashtu emrin e Gys Agasit, duke pretenduar se Rama e ka përdorur atë për misione të ngjashme.
Në reagimin e tij, deputeti i PD-së ngriti edhe pretendime të tjera lidhur me takime me ndërtues, ndarjen e tenderave, aktivitetin e SHISH-it dhe çështjen e AKSHI-t, duke i paraqitur ato si pjesë të një mënyre funksionimi të pushtetit përmes porosive, presionit dhe marrëveshjeve të dyshuara.
“Kjo është mënyra se si ai funksionon, si vepron. Me porosi, me shantazhe, me joshje, me pakte kriminale”, shkruan Këlliçi.
Në përfundim, ai e cilësoi çështjen Veliaj-Gogu si më shumë sesa një përplasje të brendshme mes grupeve politike, duke e përdorur atë për të përsëritur akuzat ndaj kryeministrit për mënyrën e ushtrimit të pushtetit.
