Opozita izraelite kërkon largimin e Netanyahut pas zgjedhjeve në SHBA: Është i rrezikshëm për Izraelin

Udhëheqës të opozitës në Izrael kanë kërkuar largimin e kryeministrit Benjamin Netanyahu, duke argumentuar se vazhdimi i qëndrimit të tij në pushtet mund të dëmtojë më tej marrëdhëniet me Shtetet e Bashkuara dhe imazhin ndërkombëtar të vendit.

Reagimet erdhën të mërkurën, pas rezultateve të zgjedhjeve të mesit të mandatit në SHBA, ku demokratët pritet të marrin kontrollin e Kongresit amerikan.

Kreu i partisë opozitare Demokratike, Yair Golan, deklaroi se rezultatet kanë nxjerrë në pah pakënaqësinë ndaj Netanyahut si në radhët e demokratëve, ashtu edhe te një pjesë e republikanëve.

Në një postim në platformën X, Golan paralajmëroi se vazhdimi i bashkëqeverisjes së Netanyahut me ministrin e Sigurisë Kombëtare, Itamar Ben-Gvir, mund ta çojë Izraelin drejt sanksioneve, izolimit ndërkombëtar dhe përplasjeve me aleatin e tij kryesor, SHBA-në.

Sipas tij, Izraeli ka nevojë për një qeveri të re, e cila të rikthejë pozicionin ndërkombëtar të vendit, të ndjekë marrëveshje afatgjata politike e strategjike dhe të garantojë sigurinë.

Golan e cilësoi zgjedhjen politike të Izraelit si një përballje mes vazhdimit të politikave të Netanyahut dhe krijimit të një qeverie të re.

“Netanyahu humbi zgjedhjet. Ai është i rrezikshëm për Izraelin. Nuk kemi kohë për të humbur. Duhet të formojmë një qeveri ndryshimi tani”, deklaroi ai.

Edhe ligjvënësi izraelit Gilad Kariv kërkoi largimin e kryeministrit, duke e akuzuar se ka dëmtuar marrëdhëniet me Partinë Demokratike amerikane dhe me një pjesë të republikanëve.

“Ai nuk duhet të vazhdojë të udhëheqë shtetin e Izraelit”, u shpreh Kariv, duke kundërshtuar gjithashtu idenë e krijimit të një qeverie uniteti nën drejtimin e Netanyahut.