Një ngjarje e rëndë është regjistruar mesditën e sotme në qytetin e Elbasanit, ku një shpërthim i fuqishëm në një apartament në lagjen “Beqir Dardha” i ka marrë jetën një 83-vjeçar.
Si pasojë e shpërthimit, tetë persona të tjerë mes tyre një fëmijë janë asfiksuar dhe janë transportuar në spital për të marrë ndihmë mjekësore.
Sipas informacioneve paraprake, ata ndodhen jashtë rrezikut për jetën.
Shpërthimi ka qenë tepër i fuqishëm, duke shkaktuar dëme të konsiderueshme në ndërtesë ndërsa paraprakisht dyshohet për shpërthimin e një bombule gazi.
Muret e apartamentit janë shembur, ndërsa janë dëmtuar edhe një pjesë e shkallëve të pallatit.
