Sulmet ruse ndaj Ukrainës kanë shkaktuar ndërprerje të energjisë elektrike dhe furnizimit me ujë në Kiev dhe zonat përreth, ndërsa bilanci i viktimave nga bombardimi i një fshati në jug të vendit ka shkuar në 40.
Sulmi më tragjik ndodhi të hënën në fshatin Komyshuvakha, në rajonin e Zaporizhzhias, pranë vijës së frontit. Avionët rusë hodhën disa bomba të drejtuara mbi një ish-shkollë dhe një strehim të improvizuar, ku në atë moment ndodheshin dhjetëra banorë që prisnin të merrnin ndihma humanitare.
Presidenti ukrainas Volodymyr Zelensky njoftoi se numri i viktimave ka arritur në 40, ndërsa deri në 30 persona të tjerë mund të ndodhen ende nën rrënoja. Operacionet e kërkim-shpëtimit vijojnë për të tretën ditë radhazi, pavarësisht se dronët rusë po vështirësojnë punën e ekipeve në terren.
Pamjet e regjistruara nga kamera e trupit të një polici, i cili humbi jetën gjatë bombardimit, tregojnë momentet e fundit të sulmit. Në video, efektivi dëgjohet duke u kërkuar të mbijetuarve të zbresin në strehim, ndërsa pak çaste më vonë regjistrimi ndërpritet nga shpërthimi.
Ndërkohë, sulmet ruse kanë vijuar edhe ndaj infrastrukturës energjetike. Sipas Forcave Ajrore të Ukrainës, Rusia lëshoi gjatë natës 310 dronë, mes tyre 81 dronë me motor reaktiv. Mbrojtja ajrore ukrainase arriti të rrëzojë ose neutralizojë 272 prej tyre.
Në Kiev, banorët mbetën për orë të tëra pa energji elektrike dhe ujë. Autoritetet ngritën qendra emergjence në zonat më të prekura, ku qytetarët mund të merrnin çaj të ngrohtë dhe të karikonin pajisjet elektronike. Për furnizimin me ujë, banorëve iu kërkua të përdornin pikat publike të shpërndarjes.
Në Bruksel pritet të diskutohen garancitë e sigurisë për Ukrainën
Zhvillimet në frontin e luftës vijnë në prag të një takimi në Bruksel, ku zyrtarë nga SHBA-ja, Gjermania, Franca, Britania e Madhe, NATO dhe Bashkimi Europian pritet të diskutojnë mbështetjen për Ukrainën pas përfundimit të luftës, rindërtimin e vendit dhe garancitë e sigurisë.
Takimi pritet të zgjasë deri të enjten dhe zhvillohet përpara një raundi të ri bisedimesh të ndërmjetësuara nga SHBA-ja mes Moskës dhe Kievit, të planifikuara për javën e ardhshme.
Zelensky nderon Melania Trump
Në një zhvillim tjetër, presidenti ukrainas i ka akorduar Zonjës së Parë të SHBA-së, Melania Trump, Urdhrin e Princeshës Olga, të klasit të parë, për kontributin e saj humanitar në mbështetje të Ukrainës dhe veçanërisht të fëmijëve të prekur nga lufta.
Ajo u vlerësua gjithashtu për rolin në ndërmjetësimin e një armëpushimi gjashtëditor në qytetin e pushtuar të Oleshky, në rajonin e Khersonit, i cili mundësoi evakuimin e banorëve të bllokuar atje.
Hetim për korrupsion në nivelet e larta të Ukrainës
Ndërkohë, Byroja Kombëtare Kundër Korrupsionit në Ukrainë ka zbuluar një skemë të dyshuar kriminale ku përfshihen zyrtarë të lartë të shërbimit të sigurisë, prokurorisë së përgjithshme dhe policisë kombëtare.
Sipas hetuesve, zyrtarët dyshohet se kanë marrë ryshfete nga grupe kriminale në këmbim të mbrojtjes së aktiviteteve të paligjshme, mes tyre qendra mashtruese telefonike, tregtia e drogës dhe kontrabanda e cigareve e valutave.
Nga ana tjetër, Ministria ruse e Mbrojtjes pretendoi se gjatë natës kishte rrëzuar 709 dronë ukrainas. Një prej sulmeve shkaktoi zjarr në një qendër logjistike të kompanisë së tregtisë online Ozon, në rajonin e Adigeas, por fatmirësisht nuk u raportuan viktima.
