As qindra kilometra larg Tokës, tre astronautë amerikanë nuk hoqën dorë nga e drejta e tyre për të votuar në zgjedhjet e mesit të mandatit në SHBA. Anil Menon, Luke Delaney dhe Jessica Watkins, pjesë e ekuipazhit të Stacionit Ndërkombëtar Hapësinor (ISS), plotësuan fletëvotimet në mënyrë elektronike dhe ia dërguan ato në mënyrë të sigurt autoriteteve zgjedhore amerikane.
Lajmin e bëri të ditur astronauti Anil Menon përmes një postimi në platformën X, ku publikoi edhe një video 29-sekondëshe, duke mbajtur një ngjitëse me mbishkrimin “Unë votova”.
“Po, mund të votoni edhe nga hapësira! Të tre anëtarët amerikanë të ekuipazhit patën privilegjin të votonin nga stacioni hapësinor. Ne plotësuam një fletëvotim elektronik dhe e dërguam në mënyrë të sigurt te zyrtarët zgjedhorë”, shkroi Menon.
Por si funksionon votimi kur zgjedhësit ndodhen jashtë Tokës? NASA shpjegon se procedura është e ngjashme me atë që përdorin amerikanët që ndodhen larg vendbanimit të tyre. Astronautët plotësojnë një formular të posaçëm për të kërkuar fletëvotimin në distancë, më pas e marrin atë në mënyrë elektronike, e plotësojnë dhe e dërgojnë në mënyrë të sigurt te autoritetet përkatëse zgjedhore.
Kjo mundësi ekziston që prej vitit 1997, kur Teksasi miratoi një ligj që u garanton astronautëve të drejtën për të votuar edhe gjatë misioneve hapësinore. Astronautët e NASA-s zakonisht regjistrohen për të votuar në Qarkun Harris të këtij shteti, ku ndodhet Qendra Hapësinore e Hjustonit.
I pari që e shfrytëzoi këtë mundësi ishte astronauti David Wolf, i cili në vitin 1997 votoi nga stacioni hapësinor rus “Mir”.
Luke Delaney dhe Jessica Watkins mbërritën në ISS më 1 tetor, si pjesë e misionit Crew-13 të kompanisë SpaceX. Ndërsa Anil Menon ndodhet në stacion që prej mesit të korrikut, pasi udhëtoi me një anije kozmike ruse të tipit Soyuz.
Tre amerikanët ndajnë aktualisht laboratorin orbital me katër anëtarë të tjerë të ekuipazhit: astronautin kanadez Joshua Kutryk dhe kozmonautët rusë Anna Kikina, Pyotr Dubrov dhe Sergey Teteryatnikov.
Rasti i tyre tregon se e drejta e votës mund të ushtrohet edhe në kushte krejt të pazakonta, falë procedurave elektronike të posaçme që lidhin astronautët me autoritetet zgjedhore, pavarësisht distancës nga Toka.
Yes, you can even vote from space! All three US crew members had the privilege of voting from space station. We filled out an electronic ballot and sent it securely to the election officials. https://t.co/hJCExQ2nKr
— Anil Menon (@astro_anil) November 3, 2026