Kërcënimet hibride dhe fushatat e dezinformimit kërkojnë një përgjigje të koordinuar nga vendet anëtare të NATO-s. Ministri i Mbrojtjes, Ermal Nufi, ka bërë thirrje për forcimin e bashkëpunimit brenda Aleancës, duke theksuar se siguria nuk kufizohet më vetëm te mbrojtja e territorit, por shtrihet edhe në hapësirën digjitale dhe atë informative.

Në një intervistë për POLITICO Europe, Nufi u shpreh se fushatat keqdashëse në internet dhe dezinformimi synojnë të cenojnë besimin e publikut, të nxisin përçarje dhe të dobësojnë qëndrueshmërinë e shoqërive demokratike.

Përballë këtyre rreziqeve, ministri nënvizoi nevojën për një NATO më aktive, me mekanizma të koordinuar, ekspertizë të specializuar dhe ekipe reagimi që mund të mbështesin vendet anëtare në përballimin e kërcënimeve të tilla.

Sipas Ministrisë së Mbrojtjes, për Shqipërinë, mbrojtja e sigurisë kombëtare përfshin jo vetëm territorin, por edhe institucionet, qytetarët dhe hapësirën informative të vendit.

“Përballë sfidave të reja, vendi ynë mbetet i angazhuar për një Aleancë më të fortë, më të përgatitur dhe më të bashkuar, ku siguria e çdo vendi është pjesë e sigurisë së përbashkët”, theksoi Ministria e Mbrojtjes.

#ErmalNufi #NATO #SiguriaKibernetike #Dezinformimi #KërcënimetHibride