Specialja do ta hetojë përgjegjësinë e zyrtarëve të shtetit në rastin e Arlinda Zekajt

Prokuroria Speciale ka pranuar para pak ditësh dosjen lidhur me dyshimet për mosveprim të zyrtarëve policorë, prokurorëve dhe gjyqtarëve në rastin e vrasjes së Arlinda Zekajt. Sipas ushtruesit të detyrës së Kryeprokurorit të Prokurorisë Speciale, Dren Paca, hetimi do të përqendrohet në përgjegjësinë eventuale të zyrtarëve për neglizhencë të mundshme, e cila mund të ketë ndikuar në kryerjen e vrasjes

Para tri ditësh, Prokuroria Speciale e ka pranuar dosjen lidhur me dyshimet për mosveprim të zyrtarëve policorë, prokurorëve dhe gjyqtarëve në rastin e vrasjes më 25 tetor, të Arlinda Zekajt në Vitomiricë të Pejës.

Ushtruesi i detyrës së Kryeprokurorit të Prokurorisë Speciale, Dren Paca, ka thënë të mërkurën se dosja është në shqyrtim dhe se hetimi do të përqendrohet në përgjegjësinë eventuale të zyrtarëve për neglizhencë, e cila mund të ketë ndikuar në kryerjen e vrasjes.

“Prokuroria Speciale e ka këtë rast në shqyrtim, por vetëm sa u përket zyrtarëve policorë, prokurorëve dhe gjyqtarëve, eventualisht si të jenë, mund të jenë të përfshirë në rast, ndërsa raste të tjera, besoj veç se jeni informuar tashmë edhe nga zyra e kryeprokurorit të shtetit, janë duke u trajtuar nga Prokuroria Themelore në Prishtinë”, ka thënë Paca.

E gjatë ditës, Kryetarja e Kuvendit, Albulena Haxhiu, ka vizituar familjen e Arlinda Zekajt.

Haxhiu ka shprehur mbështetjen për punën e Komisionit Hetimor Parlamentar, i cili është konstituuar të hënën për të hetuar veprimet dhe mosveprimet institucionale lidhur me vrasjen e Zekajt dhe trajtimin e rasteve të dhunës ndaj grave dhe fëmijëve.

Ajo ka kërkuar që të gjithë zyrtarët që do të ftohen për të dëshmuar para komisionit t’u përgjigjen kërkesave dhe të bashkëpunojnë.

Edhe Arbëri 8 o. më parë Paca: Specialja ka marrë në shqyrtim dosjen e Arlinda Zekajt

I dyshuar për vrasjen e Arlinda Zekajt është ish-kunati i saj, tashmë i arrestuar.

Para se të vritej, ajo ka raportuar dhunën në familje dhe ka kërkuar mbrojtje nga institucionet përgjegjëse. Madje, disa orë më herët e ka raportuar ish-bashkëshortin për dhunë, me ç ‘rast ai ishte ndaluar për 48 orë.