Prokuroria Themelore në Prizren, Departamenti i Krimeve të Rënda, ka ngritur aktakuzë ndaj B.K. dhe F.S., ky i fundit në arrati, nën dyshimin për kryerjen e veprës penale “Fajdeja”, në bashkëkryerje, si dhe ndaj H.T., për veprën penale “Manipulimi me prova”.
Sipas aktakuzës, B.K. dhe F.S. dyshohet se kanë shfrytëzuar gjendjen e rëndë financiare dhe papërvojën e të dëmtuarit L.S., duke i dhënë hua shuma të ndryshme parash, me kamata dhe provizione mujore dukshëm joproporcionale me shumat e huazuara.
Përmes marrëveshjeve të njëpasnjëshme të huadhënies dhe kërkesave për shlyerjen e detyrimeve, të pandehurit dyshohet se kanë përfituar shuma të konsiderueshme parash.
Nga këto veprime, sipas Prokurorisë, L.S. dhe babait të tij, M.S., u është shkaktuar dëm financiar në vlerë prej 140 mijë eurosh.
Ndërkaq, H.T. dyshohet se në prill të vitit 2024, në Suharekë, kishte marrë nga M.S. origjinalin e një marrëveshjeje huaje të lidhur ndërmjet B.K. dhe L.S., me arsyetimin se do t’ia prezantonte B.K.-së.
Megjithatë, sipas aktakuzës, pasi ia kishte prezantuar dokumentin, H.T. e kishte shkatërruar atë dhe e kishte bërë të papërdorshëm, me qëllim që të pamundësonte përdorimin e tij në procedurë penale.
Prokurori i rastit i ka propozuar gjykatës që, pas mbajtjes së shqyrtimit gjyqësor dhe administrimit e vlerësimit të provave, të pandehurit të shpallen fajtorë dhe të dënohen sipas ligjit.