Gjermani, zëvendëskryeministri i Bavarisë gjendet i pajetë në një hotel në Berlin

Hubert Aiwanger, ministër i Ekonomisë dhe zëvendëskryeministër i Bavarisë, është gjetur pa shenja jete në një dhomë hoteli në Berlin. Ai ishte 55 vjeç.

Autoritetet gjermane konfirmuan vdekjen e politikanit, lajm që ka tronditur qarqet politike të vendit. Policia dhe Prokuroria e Berlinit kanë nisur hetimet për të zbardhur shkakun dhe rrethanat e saj.

Mediat gjermane raportojnë se Aiwanger kishte udhëtuar në Berlin për hapjen e zyrës së re të partisë së tij, Freie Wähler (Votuesit e Lirë). Në këtë aktivitet ishte parashikuar që ai të mbante një fjalim.

Për arsye shëndetësore, ai e anuloi pjesëmarrjen dhe në vend të tij shkoi një përfaqësues tjetër i partisë. Më pas, Aiwanger nuk mundi të kontaktohej. Ai u gjet i pajetë në dhomën e hotelit Neuer Fritz, në qendër të kryeqytetit gjerman.

Shkaku i vdekjes mbetet i panjohur. Policia dhe Prokuroria kanë hapur një procedurë hetimore për të sqaruar çfarë ka ndodhur dhe për të përjashtuar përfshirjen e personave të tjerë. Sipas raportimeve të fundit, autoritetet kanë planifikuar një autopsi për të përcaktuar shkakun e saktë. Hetimet vazhdojnë dhe ende nuk ka një përfundim zyrtar.

Kryeministri i Bavarisë, Markus Söder, reagoi pas vdekjes së zëvendësit të tij. Në një postim në rrjetin social X, ai e cilësoi ndarjen e papritur nga jeta të Hubert Aiwanger si një tragjedi absolute dhe shkroi se të gjithë janë thellësisht të tronditur. Söder shtoi se në këto çaste të vështira mendimet e tij janë me familjen dhe fëmijët e politikanit.

Hubert Aiwanger lindi më 26 janar 1971 në Ergoldsbach, në Bavarinë e Poshtme. Ai drejtonte Freie Wähler në nivel rajonal dhe kombëtar dhe ishte ndër figurat kryesore të partisë. Në vitin 2008 u zgjodh për herë të parë në parlamentin rajonal të Bavarisë, ku mori drejtimin e grupit parlamentar të Freie Wähler.

Pas zgjedhjeve të vitit 2018, partia e tij hyri në qeverinë rajonale përmes koalicionit me CSU-në. Aiwanger u emërua zëvendëskryeministër dhe ministër i Ekonomisë së Bavarisë. Ai lë pas partneren, Tanja Schweiger, dhe dy fëmijët e tyre.