Politika e jashtme e Maqedonisë së Veriut është vlerësuar sërish pozitivisht në Raportin e Komisionit Evropian për vitin 2026, njoftoi ministri i Punëve të Jashtme dhe Tregtisë së Jashtme, Timço Muçunski. Ai veçoi përputhjen e vendit me politikën e jashtme dhe të sigurisë së Bashkimit Evropian.
Sipas vlerësimit të Komisionit, vendi ka arritur nivel të mirë gatishmërie dhe përparimi në Kapitullin 31, që mbulon politikën e jashtme, të sigurisë dhe të mbrojtjes. Raporti konstaton se Maqedonia e Veriut vazhdon të jetë plotësisht në përputhje me Politikën e Përbashkët të Jashtme dhe të Sigurisë të BE-së.
Të lidhura
None found
Muçunski tha se Komisioni e konsideron këtë përputhje një sinjal të qartë të angazhimit strategjik të vendit për anëtarësim në Bashkimin Evropian, si dhe dëshmi të rolit të tij si partner i besueshëm. Sipas ministrit, rekomandimet e vitit të kaluar janë zbatuar kryesisht dhe dialogu politik me BE-në për çështjet e jashtme dhe të sigurisë vijon në mënyrë aktive.
Vlerësim pozitiv është dhënë edhe për Kapitullin 30, “Marrëdhëniet e Jashtme”. Aty theksohen gatishmëria e lartë, përputhja me politikën tregtare të BE-së dhe kontributi aktiv në bashkëpunimin ekonomik rajonal, bëri të ditur Muçunski.
