Conor McGregor planifikon t’i lërë dorezat e tij brenda “Oktagonit”, por jo sepse e ka mbyllur karrierën si luftëtar. Ish-kampioni në dy divizione i UFC-së ishte i ftuar special në eventin “Hype Italy” në Romë.
Gjatë një interviste në këtë event, McGregor u pyet nëse preferon artet marciale të përziera (MMA) apo luftimet pa doreza. Siç pritej, bashkëpronari i “Bare Knuckle Fighting Championship” (BKFC) e pati të vështirë të zgjidhte.
“Më pëlqejnë shumë luftimet pa doreza,” tha McGregor. “Nuk besoj se mund të ketë ndeshje të mërzitshme në këtë disiplinë. Nga ana tjetër, unë jam luftëtar i arteve marciale të përziera. Ndoshta e them këtë sepse herën e fundit nuk kalova një përvojë të mirë”, tha irlandezi.
“MMA-ja e nivelit të lartë është e vështirë të tejkalohet, por luftimet pa doreza janë tejet emocionuese, shumë të rrezikshme dhe kërkojnë më shumë guxim. Edhe unë vetë mezi pres të marr pjesë në një ndeshje pa doreza“, vazhdoi McGregor.
Kur u pyet për mundësinë e pjesëmarrjes në boksin pa doreza pasi t’i japë fund karrierës në MMA, “The Notorious” zbuloi saktësisht se si e imagjinon largimin e tij nga UFC-ja.
“Ka shumë gjasa. Do t’i lë dorezat e mia në atë ‘Oktagon’ gjatë ndeshjes sime të fundit në UFC, por jo për t’u tërhequr nga sporti, por për të njoftuar kalimin në boksin pa doreza. Dhëmbët vijnë e ikin, njësoj si hunda“, shtoi ai.
38-vjeçari ka edhe një ndeshje të mbetur në kontratën e tij me UFC-në, ndonëse organizata nuk e ka konfirmuar kurrë publikisht këtë detaj. McGregor nuk dha një datë të saktë për debutimin e tij në boksin pa doreza, por zbuloi planin kohor: një paraqitje të fundit në UFC, e ndjekur nga kalimi në boksin pa doreza.
Nëse gjithçka shkon sipas planit të McGregor-it, debutimi i tij në boksin pa doreza mund të ndodhë në fund të vitit 2027. Megjithatë, fillimisht ai duhet të shërohet dhe të përmbyllë lamtumirën e tij në UFC.
