Ministria e Punëve të Brendshme ka mirëpritur publikimin, më 4 nëntor, të Raportit të Komisionit Evropian për Kosovën 2026. Sipas ministrisë, dokumenti konfirmon përparimin në fushat që mbulohen prej saj dhe agjencive në varësi.
Raporti evidenton zgjerimin e bashkëpunimit ndërkombëtar të policisë me Europol-in, rrjetin SIENA dhe platformën EMPACT. Ai veçon gjithashtu zhvillimin e mëtejshëm të policimit të udhëhequr nga inteligjenca, rezultatet më të mira kundër krimit të organizuar, si dhe përparimin në luftimin e terrorizmit dhe parandalimin e ekstremizmit të dhunshëm.
Të lidhura
None found
Në dokument konstatohet rënia e numrit të kërkesave të pabazuara për azil që qytetarët e Kosovës paraqesin në vendet e Bashkimit Evropian. Vlerësim pozitiv merr edhe profesionalizimi i mëtejshëm i Policisë së Kosovës, përfshirë diplomimin e gjeneratës së re të kadetëve dhe përmirësimin e sistemeve të trajnimit.
Për zbatimin e rekomandimeve të raportit, ministria shprehet e përkushtuar të miratojë dokumente strategjike dhe politika përkatëse. Mes tyre janë Strategjia e Migracionit 2026–2030, Plani i Kontigjencës për Menaxhimin e Fluksit të Mundshëm të Migrantëve, Refugjatëve dhe Aplikuesve për Mbrojtje Ndërkombëtare 2026–2028, Strategjia për Menaxhimin e Integruar të Kufirit dhe Strategjia Kundër Krimit të Organizuar. Po ashtu, parashikohet themelimi i Qendrës Kombëtare për Luftimin e Terrorizmit dhe Parandalimin e Ekstremizmit të Dhunshëm.
Ministria thotë se do të vijojë të forcojë bashkëpunimin ndërinstitucional dhe marrëdhëniet me partnerët ndërkombëtarë, për të çuar përpara reformat, për të fuqizuar sundimin e ligjit dhe për ta afruar më tej Kosovën me standardet e praktikat evropiane.
Raporti për Kosovën 2026 bën pjesë në Paketën e Zgjerimit të Bashkimit Evropian. Ai shqyrton periudhën nga 1 shtatori 2025 deri më 1 shtator 2026 dhe përfshin edhe disa zhvillime të mëvonshme. Ky vlerësim publikohet dhjetë vjet pas hyrjes në fuqi të Marrëveshjes së Stabilizim-Asociimit dhe katër vjet pasi Kosova paraqiti kërkesën për anëtarësim në BE.
