BDI e cilëson raportin e Komisionit Evropian për vitin 2026 si një nga vlerësimet më shqetësuese për Maqedoninë e Veriut në vitet e fundit. Sipas partisë, dokumenti tregon se reformat kanë humbur ritmin, integrimi evropian po largohet dhe institucionet përballen me probleme serioze në funksionimin e tyre.
Në reagimin e saj, BDI thekson se, për herë të parë, Komisioni Evropian i ka trajtuar kaq qartë problemet konkrete në zbatimin e gjuhës shqipe dhe në përfaqësimin e drejtë e adekuat. Partia e quan këtë pasojën më të rëndë politike të qeverisjes së VMRO-DPMNE-së me VLEN-in, duke argumentuar se çështjet e barazisë, që duhej të ishin garanci të padiskutueshme institucionale, tashmë janë bërë shqetësim evropian.
Të lidhura
None found
Sipas BDI-së, VLEN u bë pjesë e Qeverisë me zotimin për të përfaqësuar shqiptarët, por pasojat e pjesëmarrjes së saj në qeverisje sot pasqyrohen në Bruksel.
BDI kujton se Balancuesi është shfuqizuar dhe se çështja e mekanizmit të ri të përfaqësimit ende nuk ka marrë zgjidhje. Ndërkohë, qytetarët dhe studentët shqiptarë, sipas partisë, vijojnë të hasin pengesa në ushtrimin e të drejtave të tyre gjuhësore.
Partia e përshkruan si alarmuese edhe gjendjen në sektorë të tjerë. Ajo thotë se nuk ka pasur përparim në luftën kundër korrupsionit, në lirinë e shprehjes, në prokurimet publike, si dhe në mbrojtjen e konsumatorëve dhe shëndetësisë. Sipas BDI-së, qeverisja që premtoi reforma ka sjellë ngecje në fusha themelore të shtetit.
Në të njëjtën kohë, thekson BDI, Shqipëria po përparon në negociata dhe Mali i Zi po i afrohet përfundimit të tyre. Maqedonia e Veriut, ndërkaq, mbetet jashtë ritmit të ri të zgjerimit dhe nuk ka hapur ende as klasterin e parë.
BDI shprehet se qytetarët po paguajnë çmimin e drejtimit politik të qeverisë aktuale. Sipas saj, vendi po humb kohë në rrugën evropiane, ndërsa shqiptarët po përballen sërish me vënien në diskutim të të drejtave që i konsideronin të garantuara.
Partia vlerëson se raporti duhet të jetë një sinjal alarmi për ndryshimin e menjëhershëm të kursit qeverisës. BDI thekson se barazia, funksionimi i shtetit dhe perspektiva evropiane nuk mund të vazhdojnë të dëmtohen nga kjo qeverisje.
