Jeffrey Weisheit, i dënuar me vdekje për vrasjen e dy fëmijëve të vegjël të partneres së tij, është ekzekutuar me injeksion vdekjeprurës në Shtetet e Bashkuara. Ai i kishte lidhur fëmijët dhe i kishte vënë flakën banesës ku ndodheshin.
Ekzekutimi i 50-vjeçarit u krye të enjten në burgun shtetëror të Indianës, në Michigan City. Injeksioni iu dha pak pas mesnatës, ndërsa vdekja u konfirmua në orën 00:45, sipas orës lokale.
Të lidhura
None found
Autoritetet e burgjeve në Indiana bënë të ditur se vakti i fundit i Weisheit përfshinte brinjë derri në skarë. Ai nuk dha deklaratë të fundit.
Krimi ndodhi më 2010 në Evansville të Indianës. Weisheit i vuri zjarrin shtëpisë së partneres, ku ndodheshin fëmijët e saj, Alyssa Lynch, 8 vjeçe, dhe vëllai i saj, Caleb Lynch, 5 vjeç.
Gjatë hetimeve, trupi i Alyssa-s u zbulua në një dollap, kurse Caleb-i u gjet mbi një dyshek. Ai ishte lidhur me shirit ngjitës. Pranë tij u gjetën dy flakadanë hekurudhorë; njëri ishte vendosur në të brendshmet e fëmijës.
Kur ndodhi tragjedia, Lisa Lynch ishte në punë dhe i kishte lënë fëmijët nën kujdesin e Weisheit. Ata kishin një marrëdhënie romantike, e cila, sipas hetuesve, po kalonte vështirësi.
Në gjykatë, nëna foli për dhimbjen e humbjes. Ajo tregoi se Alyssa ishte krijuese, e pasionuar pas vizatimit dhe shpesh vizatonte familjen e saj. Caleb-in e kujtoi si fëmijë të dashur, të cilit i pëlqenin përqafimet, gatimi dhe lojërat me kamionë e trena.
“Të jetosh çdo ditë pa ta është një betejë. Ditëlindjet, festat dhe çdo çast i rëndësishëm sjellin me vete dhimbjen e mungesës së tyre. Vitet kalojnë, por barra e humbjes mbetet. Ata do të jenë gjithmonë fëmijët e mi”, tha ajo.
Weisheit u dënua me vdekje më 2013. Avokatët e tij kërkuan që të kryheshin skanime të trurit, duke pretenduar se ai kishte pësuar dëmtime në kokë dhe kishte probleme të shëndetit mendor, të cilat nuk ishin vlerësuar mjaftueshëm gjatë gjyqit.
Guvernatori republikan i Indianës, Mike Braun, nuk pranoi kërkesën për ekzaminime të tjera dhe as atë për ta kthyer dënimin me vdekje në burgim të përjetshëm.
Avokatët ngritën kundërshtime të fundit edhe për substancat e përdorura në injeksionin vdekjeprurës. Ato ishin siguruar nga një farmaci që përballej me seancë disiplinore pranë Bordit të Farmacisë së Indianës. Autoritetet e burgjeve deklaruan se ekzekutimi do të kryhej në mënyrë humane.
Pas ekzekutimit, guvernatori Braun tha se çështja ishte shqyrtuar disa herë nga gjykatat shtetërore dhe federale dhe se asnjëra nuk e kishte rrëzuar vendimin. Prokurori i Përgjithshëm i Indianës, Todd Rokita, e quajti ekzekutimin drejtësi të shumëpritur për dy fëmijët e pafajshëm.
Të enjten ishin planifikuar edhe dy ekzekutime të tjera në SHBA, një në Florida dhe një në Alabama. Po të kryheshin të tria, do të ishte hera e dytë këtë vit që tre persona ekzekutoheshin në vend brenda një dite.
Në Florida ishte parashikuar ekzekutimi i Jesse Guardado-s, 64 vjeç, i dënuar për vrasjen me thikë të një gruaje 75-vjeçare në banesën e saj më 2004. Pas vrasjes, ai kishte marrë bizhuteri dhe para për të financuar varësinë nga droga.
Gjatë këtij viti, Florida ka kryer 19 ekzekutime, duke barazuar rekordin e vitit 2025. Më shumë se gjysma e ekzekutimeve të kryera në SHBA këtë vit janë realizuar në këtë shtet.
Edhe ekzekutimi i Michael Taylor-it, 54 vjeç, ishte planifikuar për të enjten në Alabama. Ai ishte dënuar për vrasjen e një çifti të moshuar, të cilin e kishte goditur për vdekje me një shufër metalike gjatë një grabitjeje në banesën e tyre, 35 vjet më parë.
Mbrojtësit e Taylor-it kërkuan që dënimi me vdekje të zëvendësohej me burgim të përjetshëm. Ata argumentuan se ai ishte vetëm 19 vjeç kur kreu krimin dhe se duhej të merreshin parasysh mosha dhe papjekuria e tij. Guvernatorja republikane e Alabamës, Kay Ivey, megjithatë, nuk pranoi kërkesën për falje.
Ekzekutimet e parashikuara në këto tri shtete e rikthejnë në qendër të vëmendjes debatin në SHBA për dënimin me vdekje dhe mënyrat e zbatimit të tij.
