Tregjet rrisin pritshmëritë për një tjetër rritje të interesave në Britani në dhjetor

Pritshmëritë e tregjeve financiare për një tjetër rritje të normës bazë të interesit në Britani në dhjetor janë shtuar, pas vendimit të Bankës së Anglisë për të rritur koston e huamarrjes në 4%, në kushtet e presioneve inflacioniste të nxitura nga çmimet e larta të energjisë.

Tregjet monetare tashmë vlerësojnë rreth 50% probabilitet për një rritje tjetër të normës në dhjetor, nga rreth 30% përpara vendimit të së enjtes. Ndërkohë, pritshmëritë për shtrëngimin e mëtejshëm monetar deri në fund të vitit 2027 janë rritur në rreth 76 pikë bazë, nga 67 pikë bazë më parë.

Sipas Reuters, reagimi i investitorëve u reflektua edhe në tregun e obligacioneve britanike. Yield-i i obligacioneve 10-vjeçare u rrit në 5.17%, ndërsa ai i titujve dyvjeçarë, më të ndjeshëm ndaj pritshmërive për normat e interesit, arriti në 4.79%.

Guvernatori i Bankës së Anglisë, Andrew Bailey, deklaroi se një tjetër rritje mund të jetë e nevojshme nëse konflikti në Lindjen e Mesme vijon dhe çmimet e energjisë mbeten të larta. Megjithatë, ai theksoi se vendimi i fundit nuk duhet interpretuar si fillimi i një cikli të pashmangshëm rritjesh të normave.

Banka e Anglisë e rriti normën bazë me 0.25 pikë përqindjeje, në 4%, në vendimin e saj të 5 nëntorit. Komiteti i Politikës Monetare votoi me shumicë prej tetë anëtarësh pro rritjes, ndërsa një anëtar kërkoi një shtrëngim më të fortë, prej 0.5 pikë përqindjeje.

Institucioni parashikon që inflacioni britanik të arrijë rreth 5% në mesin e vitit 2027, më shumë se dyfishi i objektivit prej 2% të bankës qendrore./ Reuters