Rama dhe ministri Karakaçi inspektojnë Bypass-in e Tiranës: Çliron kryeqytetin nga trafiku

Kryeministri Edi Rama së bashku me ministrin e Infrastrukturës dhe Energjisë, Enea Karakaçi dhe kreun e ARRSH-së Ami Kozeli kanë kryer inspektim në kantierin e Bypass-it të Tiranës. Ata theksojnë se punimet po ecin me ritme të shpejta.

Ministri i Infrastrukturës dhe Energjisë, Karakaçi tha se deri tani, punimet janë kryer mbi nivelin 50 përqind.

“Jemi në mbi 50 përqind të nivelit të punimeve. Ky segment do jetë një nyje strategjike e infrastrukturës rrugore, që do të lidhë akset e Korridorit Blu, si dhe autostradën Tiranë–Durrës me Tiranë–Elbasan. Dalim nga nevoja për të hyrë në Tiranë për çdo segmentim në jug.

Kjo mbaron në shtator të vitit 2027. Synimi është ti mbyllim para afatit. Element i rëndësishëm është që projekti është i integruar. Nuk kemi vetëm një autostradë por kemi dhe ndërlidhjen e të gjitha fshatrave dhe njësive administrative. Projekti nuk lë jashtë këto njesi administrative apo banorët”, tha Enea Karakaçi.

Nga ana tjetër kryeministri Edi Rama theksoi gjatë inspektimit se me anë të këtyre punimeve do bëhët e mundur çlirimi i kryeqytetit nga trafiku.

“Të gjithë duhet ta dinë se është rritje e ndjeshme e vlerës së pronës së tyre. Çdo shpronësim do bëhet ashtu siç duhet, sipas ligjit. Do jetë një aks që do ta çlirojë kryeqytetin nga një ngarkesë e tepërt që vjen si mungesë e këtij aksi.

Në pjesë e fluksit do vazhdojë lirshëm drejt jugut, dhe pjesa tjetër do ketë më shumë lirshmëri për të hyrë e dalë në kryeqytet”, tha Rama.