Presidenti i Shteteve të Bashkuara të Amerikës, Donald Trump, ka nënshkruar një urdhër ekzekutiv që synon t’i japë statusin e monumentit kombëtar Zyrës Ovale dhe disa hapësirave ngjitur me të në Shtëpinë e Bardhë.
Sipas kreut të Shtëpisë së Bardhë, vendimi ka për qëllim ruajtjen e karakterit historik dhe arkitekturor të ambienteve ku presidentët amerikanë ushtrojnë detyrën, duke kufizuar mundësinë e ndërhyrjeve të mëdha nga administratat e ardhshme.
“Po e shpallim monument kombëtar dhe askush nuk do të ketë të drejtë ta prekë, ta shkatërrojë apo ta shembë”, deklaroi Trump gjatë një komunikimi me gazetarët të enjten.
Ky vendim vjen në një kohë kur vetë presidenti amerikan ka realizuar një sërë ndërhyrjesh në dekorin e Zyrës Ovale gjatë mandatit të tij të dytë. Ndryshimet përfshijnë veçanërisht shtimin e zbukurimeve dhe elementeve luksoze me ngjyrë ari, të cilat i kanë dhënë ambientit një pamje të re.
Nisma e fundit pason gjithashtu një tjetër projekt të diskutueshëm të administratës Trump, shembjen e Krahut Lindor të Shtëpisë së Bardhë për t’i hapur rrugën ndërtimit të një salle të re për organizimin e aktiviteteve dhe pritjeve zyrtare.
Projekti ka shkaktuar debate dhe është përballur me kundërshtime ligjore, ndërsa punimet kanë vijuar pas marrjes së miratimit nga Kongresi amerikan.
Vendimi për mbrojtjen e Zyrës Ovale synon të vendosë kufizime afatgjata mbi ndryshimet që mund t’i bëhen një prej ambienteve më simbolike të pushtetit presidencial në Shtetet e Bashkuara.