Pasuritë në Tiranë dhe Durrës dyshohet se janë krijuar me të ardhura të pajustifikuara. Hetimi pasuror lidhet me laboratorin e kokainës në Frakull të Fierit, ku në vitin 2022 u sekuestruan 485.5 kilogramë drogë të ardhur nga Kolumbia.
Prokuroria e Posaçme (SPAK) ka përfunduar hetimet pasurore ndaj Nikolin dhe Klevent Gjolenës, duke kërkuar konfiskimin e 16 pasurive të paluajtshme, me vlerë aktuale tregu mbi 2 milionë euro.
Kërkesa për konfiskim, pjesë e procedimit pasuror nr. 5 të vitit 2025, është depozituar më 6 nëntor 2026 në Gjykatën e Posaçme të Shkallës së Parë. Në këtë proces përfshihen dy vëllezërit Gjolena, si dhe gjashtë persona të tjerë të lidhur me ta.
Sipas hetimeve të SPAK, pasuritë dyshohet se janë krijuar me burime financiare të paligjshme, pasi personat nën hetim nuk kanë arritur të justifikojnë origjinën e të ardhurave të përdorura për blerjen e tyre.
Në kuadër të hetimit financiar, përmes ekspertimit kontabël janë identifikuar pesë transferta monetare në vlerën 42.942 dollarë dhe 404.733 euro. Transfertat janë kryer në emër të familjarëve të personave nën hetim, ndërsa fondet dyshohet se kanë ardhur nga vende të Amerikës Qendrore dhe rajonit të Karaibeve, të njohura si parajsa fiskale.
Në listën e pasurive për të cilat kërkohet konfiskimi përfshihen tre apartamente dhe dy garazhe në Tiranë, si dhe tre njësi tregtare dhe tetë apartamente në zonën e Plazhit në Durrës.
Vlera e këtyre pasurive në momentin e lidhjes së kontratave llogaritet rreth 1 milion euro, ndërsa sipas çmimeve aktuale të tregut ajo tejkalon 2 milionë euro.
Hetimi lidhet me kokainën e sekuestruar në Frakull
Procedimi pasuror ka si bazë hetimet penale për trafikimin e 485.5 kilogramëve kokainë, të zbuluara dhe sekuestruara më 24 nëntor 2022 në fshatin Frakull e Madhe të Fierit.
Droga ishte fshehur në një ngarkesë me pleh organik artificial, e cila kishte mbërritur në Shqipëri nga Kolumbia. Zbulimi i sasisë së madhe të kokainës çoi në hetime të gjera për aktivitetin e organizatës kriminale dhe personat e përfshirë në të.
Nikolin Gjolena është dënuar më parë nga Gjykata e Posaçme. Me vendimin e 26 qershorit 2024, ai u shpall fajtor për akuzat e ngritura ndaj tij dhe u dënua përfundimisht me 11 vite e 4 muaj burgim. Ky vendim u la në fuqi nga Gjykata e Posaçme e Apelit më 30 dhjetor 2024.
Tashmë, SPAK kërkon që pasuritë e dyshuara si të krijuara nga burime të paligjshme t’i nënshtrohen konfiskimit, në një proces të veçantë pasuror.