Kryeministri i Kosovës, Albin Kurti, nuk dha një përgjigje të drejtpërdrejtë për raportimet se zyrtarëve të Policisë së Kosovës u mungojnë uniformat dhe pajisjet. Kjo çështje u ngrit në ditën kur institucionit pritet t’i bashkohen mbi 300 kadetë të gjeneratës së 63-të.
I pyetur të premten për furnizimin e policëve, Kurti tha se sqarimet për uniformat, pajisjet dhe ecurinë e këtyre proceseve duhet t’i japë Ministria e Punëve të Brendshme.
Të lidhura
None found
Pas vizitës në Institutin e Krimeve të kryera gjatë luftës në Kosovë, ai u tha mediave se po shkonte në ceremoninë e diplomimit. Kurti e cilësoi shtimin e mbi 300 kadetëve të rinj si një arritje për Republikën e Kosovës dhe bëri të ditur se rreth 30% e tyre janë gra.
Kryeministri theksoi gjithashtu se buxheti për Policinë e Kosovës është rritur vazhdimisht. Sipas tij, kujdesi shtetëror dhe qeveritar për policinë, ushtrinë, oficerin dhe uniformën nuk ka qenë asnjëherë më i madh se tani.
Ceremonia e diplomimit të gjeneratës së 63-të të Policisë së Kosovës do të mbahet sot pasdite.
