Presidenti amerikan kërcënon me veto ndaj ligjeve nëse republikanët dhe demokratët nuk arrijnë marrëveshje. Deklarata vjen pas zgjedhjeve të mesmandatit, të cilat kanë ndryshuar balancat politike në Kongresin amerikan.

Presidenti i Shteteve të Bashkuara, Donald Trump, ka paralajmëruar se do të përdorë të drejtën e vetos nëse demokratët dhe republikanët nuk arrijnë të bashkëpunojnë për miratimin e nismave në Kongres.

Përmes një deklarate, Trump u bëri thirrje të dyja palëve të punojnë së bashku, duke lënë të qartë se në të kundërtën do të bllokojë ligjet që nuk do të kenë mbështetjen e tij.

“Demokratët dhe republikanët mund të jenë shumë produktivë nëse punojnë së bashku. Por, nëse nuk ndodh kjo, atëherë veprojmë kështu: VETO”, deklaroi presidenti amerikan.

Paralajmërimi vjen pas zgjedhjeve të mesmandatit, ku demokratët kanë siguruar shumicën në të dyja dhomat e Kongresit amerikan, duke ndryshuar ndjeshëm raportin e forcave politike në Uashington.

Ky rezultat pritet t’ia vështirësojë administratës Trump miratimin e ligjeve dhe zbatimin e agjendës së saj politike, pasi shumica parlamentare tashmë kontrollohet nga opozita.

Megjithatë, presidenti amerikan ka të drejtën kushtetuese të vetos për të kundërshtuar ligjet e miratuara nga Kongresi. Kjo e drejtë mund të tejkalohet vetëm nëse projektligji merr mbështetjen e dy të tretave të anëtarëve në të dyja dhomat.

Sipas rezultateve të bëra publike, demokratët kanë siguruar 54 vende në Senat, përfshirë dy senatorë të pavarur që votojnë me ta, ndërsa republikanët kanë 44 vende.

Në Dhomën e Përfaqësuesve, demokratët numërojnë 253 vende, kundrejt 157 të republikanëve.

Me këtë konfigurim të ri politik, përplasjet mes Shtëpisë së Bardhë dhe Kongresit pritet të jenë një nga sfidat kryesore të administratës Trump.