Të paktën 27 fluturime në Europë janë përfshirë nga kërcënime për vendosjen e bombave, duke vënë në lëvizje autoritetet e sigurisë në disa vende dhe detyruar avionët luftarakë të ngrihen në ajër. Alarmet janë regjistruar në fluturime me destinacion ose nisje nga Franca, Italia, Austria, Bullgaria, Çekia, Belgjika dhe Spanja, ndërsa disa avionë janë detyruar të ndryshojnë itinerarin ose të kryejnë ulje të paplanifikuara.
Shtatë prej fluturimeve të prekura kishin lidhje me Italinë. Një avion i linjës Dublin-Romë u shoqërua nga avionë luftarakë francezë Rafale dhe u detyrua të ulej në një bazë ushtarake në Normandi. Pas incidentit, prokuroria franceze nisi hetimet ndaj pilotit, i cili dyshohet se fillimisht nuk pranoi urdhrin për ulje në aeroportin ushtarak dhe kërkoi të drejtohej drejt një aeroporti civil.
Një tjetër avion, që po fluturonte nga Milano drejt Varshavës, kreu ulje emergjente në Vjenë. Ndërkohë, kërcënime të ngjashme u raportuan edhe në fluturime drejt Pragës, Sofjes, Brukselit dhe Madridit.
Sipas autoriteteve italiane, kërcënimet ndaj dy fluturimeve drejt Romës u dërguan përmes një emaili në gjuhën italiane, të nënshkruar nga një grup që prezantohet si “Luftëtarët e Shtetit Mashkullor”. Hetuesit dyshojnë për një lidhje të mundshme me lëvizjen ruse “Male State”, një grup ekstremist i së djathtës radikale, i njohur për ideologjinë mizogjene, homofobe dhe antifeministe. Kjo lëvizje bën pjesë në atë që njihet si manosfera ruse, një rrjet komunitetesh online që promovojnë epërsinë mashkullore dhe qëndrime armiqësore ndaj grave.
Ministri italian i Mbrojtjes, Guido Crosetto, paralajmëroi se incidentet mund të jenë pjesë e një strategjie më të gjerë destabilizimi. “Gjithçka është e lidhur: frigoriferët, gjaku në Francë, dronët, avionët. Jetojmë në një periudhë të tillë”, deklaroi ai, duke shtuar se ngjarje të tilla synojnë të shtojnë kaosin.
Edhe drejtuesi i grupit ajror Air France-KLM, Ben Smith, e cilësoi të pazakontë shkallën e koordinimit të këtyre alarmeve. Megjithatë, Komisioni Europian ka bërë të ditur se është ende herët për të përcaktuar nëse kërcënimet kanë një burim apo lidhje të përbashkët.
Deri tani, kontrollet e kryera në avionët e inspektuar nuk kanë zbuluar lëndë shpërthyese. Autoritetet vijojnë hetimet për të identifikuar personat përgjegjës dhe për të përcaktuar nëse bëhet fjalë për incidente të izoluara apo për një fushatë të koordinuar kërcënimesh.