Kryeministri Edi Rama ka publikuar pamje nga ambientet e reja të Shtëpisë së Shahut, duke njoftuar një mbështetje të posaçme financiare për përhapjen e këtij sporti në shkollat e vendit.
Përmes një postimi në rrjetet sociale, kreu i qeverisë ka vënë në dukje rëndësinë e investimit për komunitetin shahistik, ndërsa ka bërë të ditur se do të ketë një buxhet të dedikuar për ta shtrirë këtë aktivitet në sa më shumë institucione arsimore.
“Një hap i rëndësishëm për komunitetin shahistik dhe një mbështetje e re për shahun në shkolla, me buxhet të dedikuar për ta shtrirë në sa më shumë shkolla të vendit. Më shumë shah, më shumë mendje të mprehta”, shkruan Rama.
Ambientet e reja të Shtëpisë së Shahut synojnë të krijojnë kushte më të mira për zhvillimin dhe promovimin e këtij sporti, ndërsa nisma për përfshirjen e tij në shkolla pritet t’u japë mundësi më shumë fëmijëve dhe të rinjve të njihen me lojën e shahut.
Përmes kësaj mbështetjeje, synohet që shahu të mos mbetet vetëm një aktivitet për komunitetin sportiv, por të fitojë një hapësirë më të gjerë edhe në sistemin arsimor.