Lista Studentore deklaroi se është jashtëzakonisht e rëndësishme që prokuroritë kompetente të hetojnë pretendimet që e lidhin drejtpërdrejt Aleksandar Vuçiç me grupin e strukturuar kriminal të Darko Šarić dhe Veljko Belivuk, me qëllim përcaktimin nëse këto pretendime mund të bëhen objekt i procedimeve penale, shkruan Vreme.
Lista Studentore shkroi në faqen e saj zyrtare se është e nevojshme të përcaktohen marrëdhëniet e ish-presidentit me strukturat kriminale, si dhe të kryhen hetime të tjera.
Lista Studentore i bëri thirrje kryeprokurores publike Zagorka Dolovac që të caktojë një prokuror kompetent, i cili do të nisë procedurën e hetimit paraprak për të përcaktuar përgjegjësinë e mundshme penale të qytetarit Aleksandar Vuçiç.
Njëkohësisht, iu drejtua edhe prokurorit publik për krimin e organizuar, Mladen Nenadić, me kërkesën që të hapë një çështje ndaj të gjithë personave që kanë marrë pjesë në këto veprime dhe të mbledhë dokumentacionin e nevojshëm.
“Korrespondencat e Sky ndodhen aktualisht në Ministrinë e Punëve të Brendshme dhe janë marrë nga Europol, i cili ia ka përcjellë mesazhin Eurojust-it. Në të, Ministria e Punëve të Brendshme informohet se, nga 1 dhjetori i këtij viti, autoritetet kompetente franceze nuk do të pranojnë kërkesa për ndihmë juridike ndërkombëtare që kërkojnë të dhëna nga aplikacioni Sky ECC për përdorim gjyqësor, ndërsa të gjitha kërkesat e mbërritura deri në atë datë do të ekzekutohen”, thuhet në deklaratë.
Në këtë kuadër, studentët i bënë thirrje Ministrisë së Punëve të Brendshme që të caktojë urgjentisht një sektor brenda Drejtorisë së Policisë Kriminale (UKP), i cili do të merret me hetimin e korrespondencave dhe dorëzimin e dokumentacionit në prokurorinë kompetente, me qëllim zhvillimin e një hetimi për përgjegjësinë penale të ish-zyrtarëve qeveritarë.
“Në këtë periudhë tranzicioni, është e nevojshme t’u bëhet thirrje drejtuesve aktualë të institucioneve shtetërore që të mos u nënshtrohen presioneve të një partie politike apo të një individi, të mos ndiejnë frikë për shkak se po bëjnë detyrën e tyre dhe të mos bëhen bashkëfajtorë në destabilizimin e shtetit dhe në shkaktimin e panikut te qytetarët. Ata kanë mandat të plotë dhe përpara tyre qëndrojnë Kushtetuta dhe ligji, të cilat duhet t’i respektojnë”, përfundon deklarata e Listës Studentore.
“Pas arrestimit të Marko Kričko-s, bazuar në kallëzimin e Veselin Milić të muajit korrik të këtij viti, për ne është e qartë se prokuroria synon të bëjë detyrën e saj për sa kohë që ka mandat të plotë. I inkurajojmë të vazhdojnë të veprojnë në përputhje me ligjin dhe të mos ndihen nën presion, por njëkohësisht theksojmë se duhet të mbajnë përgjegjësi si në këtë çështje, ashtu edhe në çështjet e tjera që përfshijnë përgjegjësinë penale të Veselin Milić.”
